„ეროვნულ-დემოკრატიული ინსტიტუტის“ (NDI) კვლევის მიხედვით, არჩევნების I ტურში თავისი არჩევანით კმაყოფილია გამოკითხულთა 90%, მეორეში - 87%.
კითხვაზე, კმაყოფილია, თუ არა მის მიერ 2018 წლის საპრეზიდენტო არჩევნების პირველ ტურში გაკეთებული არჩევანით, გამოკითხულთა 90% ამბობს, რომ კმაყოფილია, ხოლო 8% - უკმაყოფილო. 1%-მა არ იცის, კმაყოფილია თუ - არა. 1% კი, კითხვაზე პასუხს თავს არიდებს.
მეორე ტურთან დაკავშირებით იმავე კითხვაზე პასუხის გაცემისას, შემცირდა მათი რიცხვი, ვინც საკუთარი არჩევანით კმაყოფილია. გამოკითხულთან 87%-მა თქვა, რომ მეორე ტურში გაკეთებული საკუთარი არჩევანით კმაყოფილია, ხოლო 11%-მა თქვა, რომ არჩევანით კმაყოფილი არ არის.
კითხვაზე, შემდეგი ფორმულირებით "პირველ ტურში უფრო ვიღაცის წინააღმდეგ მივეცი ხმა, ვიდრე ვიღაცის სასარგებლოდ", მხოლოდ 29% პასუხობს, რომ ასეა. 66% დებულებას არ ეთანხმება.
იმავე კითხვაზე მეორე ტურთან დაკავშირებით შედეგები მხოლოდ 4%-ით იცვლება. 33% ამბობს, რომ მეორე ტურში უფრო ვიღაცის წინააღმდეგ მისცა ხმა, ვიდრე ვიღაცის სასარგებლოდ, ხოლო 62% მოსაზრებას არ იზიარებს.
ეროვნულ-დემოკრატიულმა ინსტიტუტმა NDI კვლევა წარმომადგენლობითი შერჩევის წესით, მთელი საქართველოს მასშტაბით ჩაატარა, გარდა ოკუპირებული ტერიტორიებისა. საველე სამუშაოები 2018 წლის 6-20 დეკემბერს, CRRC-მ ჩაატარა. გამოიკითხა 2205 ადამიანი, ცდომილების საშუალო ზღვარი +/- 2.1%-ია.
