მთავრობის ინიციატივით, წყლის ტარიფის განსაზღვრა ნებისმიერი აბონენტისთვის, კერძო თუ იურიდიული პირისთვის, ინდივიდუალურად იქნება შესაძლებელი. ამ ცვლილებას მთავრობის მიერ ინიცირებული კანონპროექტი "ელექტროენერგეტიკისა და ბუნებრივი გაზის შესახებ" საქართველოს კანონში დამატებების შეტანის თაობაზე" ითვალისწინებს.
აღნიშნული კანონპროექტი დღეს პირველი მოსმენით პარლამენტის დარგობრივი ეკონომიკის კომიტეტის სხდომაზე იქნა განხილული.
როგორც საკითხის მომხსენებელმა, რეგიონული განვითარებისა და ინფრასტრუქტურის მინისტრის მოადგილემ ლაშა გოცირიძემ განმარტა, დღეს აღნიშნული კანონით ჯვარედინი სუბსიდირება აკრძალულია. შესაბამისად ხდება ამ აკრძალვის ამოღება და 2021 წლის 1 იანვრამდე გადავადება.
გოცირიძის განმარტებით, ეს განპირობებულია იმით, რომ სემეკს მიეცეს უფლება თითოეული მიმწოდებლისათვის ინდივიდუალურად განსაზღვროს წყლის ტარიფი. დღეს კი ტარიფი ყველასთვის ერთია.
აღსანიშნავია, რომ ამ იდეას საკმაოდ კრიტიკულად აფასებს საპარალმენტო უმცირესობის წარმომადგენელი გურამ ჩახვაძე. მისი თქმით, თუ მოხდება ტარიფის შერჩევითი განსაზღვრა და იმ შემთხვევაში თუ ბიზნესს გაეზრდება წყლის ტარიფი იმ არგუმენტით, რომ მოსახლეობისთვის იქნას დაწეული, ეს გამოიწვევს უკუშედეგს.
"მეწარმე, რომელიც მოიხმარს წყალს, გააძვრებს თავის პროდუქციას და ეს ისევ მოსახლეობის სოციალურ მდგომარეობაზე აისახება უარყოფითად", _ აცხადებს ჩახვაძე.
ჩახვაძე მიიჩნევს, რომ ეს ნორმა ბიზნესში უხეში ჩარევის მცდელობაცაა და არ შეიძლება წყლით სარგებლობის საფასური იყოს დიფერენცირებული, დაურღვეველი პირობებით.
მიუხედავად ჩახვაძის ამ არგუმენტისა, დარგობრივი ეკონომიკის კომიტეტმა აღნიშნულ ინიციატივას მაინც დადებითი დასკვნა მისცა.