საქართველო მთავრობა არასოდეს ჩაერევა დამოუკიდებელი შტოს საქმიანობასა და ფუნქციონირებაში, ეს დრო ჩვენს ქვეყანაში დასრულდა, - ამის შესახებ საქართველოს პრემიერ-მინისტრმა მამუკა ბახტაძემ დღევანდელ ბრიფინგზე, სასამართლო რეფორმასთან დასმული კითხვის საპასუხოდ განაცხადა.
მთავრობის მეთაურის შეფასებით, გარკვეული პოლიტიკური ჯგუფების მხრიდან ამ თემის პრივატიზაციის მცდელობა მიუღებელია, ვინაიდან ეს არის საერთო საზრუნავი.
„ჩვენმა პოლიტიკურმა გუნდმა ერთმნიშვნელოვნად განაცხადა და ეს არის ჩვენი პრინციპული პოზიცია, რომ აუცილებლად საერთო ჩართულობით უნდა დადგინდეს კრიტერიუმები და პროცედურები, რომლის მიხედვითაც შეირჩევიან შესაბამისი მოსამართლეები. ისიც ობიექტური გარემოება გახლავთ, რომ, სამწუხაროდ, მოსამართლეების შემცირებული რაოდენობა, ხშირად იწვევს საქმეების არადროულად დასრულებას და ამაზე იუსტიციის საბჭომაც ისაუბრა. რაც შეეხება საქართველოს მთავრობის და ჩემი, როგორც პრემიერ-მინისტრის პოზიციას, მე, როგორც მოქალაქეს ნებისმიერ ადამიანზე მაქვს ჩემი შეხედულება, მაგრამ, მინდა, გავიმეორო ის, რაც ვთქვი რამდენიმე კვირის წინ - საქართველო მთავრობა არასოდეს ჩაერევა დამოუკიდებელი შტოს საქმიანობასა და ფუნქციონირებაში. ეს დრო საქართველოში დასრულდა და დარწმუნებული ვარ, არც ერთ ჩვენგანს არ სურს, იცხოვროს ისეთ ქვეყანაში, როდესაც პრემიერ-მინისტრი ან ნებისმიერი სხვა მაღალი პოლიტიკური თანამდებობის პირი რეკავდა სასამართლოში და „ალაგებდა“ ისე, როგორც მას სურდა. ჩვენ მივისწრაფვით ევროპისკენ. იმ რეფორმას, რომელიც ხორციელდება, დადებითი შეფასება აქვს ჩვენი ევროპელი პარტნიორების მხრიდან. ვფიქრობ, ჩვენი პოლიტიკური გუნდის პოზიცია, ობიექტურ კრიტერიუმებთან და პროცედურების გაწერასთან დაკავშირებით, არის სწორედ ის, რაც აუცილებელია ამ ძალიან მნიშვნელოვანი რეფორმის გზაზე კიდევ ერთ ნაბიჯის გადასადგმელად“, - განაცხადა მამუკა ბახტაძემ.
