საქართველოსა და რუსულ უმსხვილესი ბუნებრივი აირის მწარმოებელ კომპანია “გაზპრომს“ შორის ხელშეკრულება ამოიწურა. ვადა ხელშეკრულებას 2018 წლის 31 დეკემბერს გაუვიდა.
პრემიერ-მინისტრის, მამუკა ბახტაძის განცხადებით, ახალ კონტრაქტზე ჯერ მოლაპარაკებები არ გამართულა. თუ იქნება სიახლე, ეკონომიკის სამინისტრო გააცნობს საზოგადოებას.
„ჩვენ არ ვაპირებთ ჩვენს სატრანსპორტო ფუნქციაზე უარის თქმას. საქართველო საკმაოდ მნიშვნელოვან სარგებელს ნახულობს სატრანსპორტო ფუნქციის მხრიდან და ეს იქნება ჩვენი ინტერესი. რაც შეეხება კონკრეტულ ხელშეკრულებას, თუ ახალი ხელშეკრულება დაფიქსირდება, ბუნებრივია, ეკონომიკის სამინისტრო დეტალურად გააცნობს საზოგადოებას ჩვენი მასმედიის დახმარებით. მოლაპარაკებები დაიწყება მაშინ, როდესაც იქნება ამის კონკრეტული თარიღი, დედლაინი და შეხვედრა დანიშნული.
მე ვამბობ იმას, რომ საქართველო აგრძელებს თავისი ტრანზიტული ფუნქციის შესრულებას და შესაბამისად, იმ სარგებლის მიღებას, რომელიც დაკავშირებულია და ჩადებულია ამ სატრანზიტო ხელშეკრულებაში. ყოველთვის ვცდილობ, რომ ჩემი პასუხი იყოს შინაარსობრივი და ახლაც შინაარსობრივი პასუხი გაგეცით.
რაც შეეხება შიშებს და მოლოდინებს, მე შინაარსობრივ კომპონენტზე ვამახვილებ ყურადღებას, თუ გინდათ პოლიტიკურზეც გავამახვილებ. იგივე პოლიტიკური გუნდი საუბრობდა თავის დროზე, როდესაც ხელისუფლებაში იყვნენ, რომ მილსადენის გაყიდვა იგეგმებოდა. მე ვცდილობ, რომ ჩემი პასუხები იყოს შინაარსობრივი, ისეთი, როგორიც აინტერესებს მოსახლეობას.
საქართველო აგრძელებს თავის სატრანზიტო ფუნქციის შესრულებას და შესაბამისად იმ სარგებლის მიღებას, რაც არის დაკავშირებული ამ სატრანზიტო ფუნქციასთან“,-აცხადებს ბახტაძე.
