შს მინისტრის მოადგილე, კახა საბანაძე დიდ დიღომში იმ ადგილზე იმყოფება, სადაც საცხოვრებელ კორპუსში აფეთქება მოხდა. საბანაძის თქმით, მომხდართან დაკავშირებით უკვე დაიწყო გამოძიება.
შს მინისტრის მოადგილის თქმით, ფლობენ ინფორმაციას იმის შესახებ, რომ მოქალაქეებმა დღის განმავლობაში გამოიძახეს „ყაზტრანსგაზის“ წარმომადგენლები, თუმცა მათ რეაგირება არ მოუხდენიათ. საბანაძე ამბობს, რომ ამ ეტაპზე ყველა შესაბამისი სტრუქტურის წარმომადგენელი იმყოფება ადგილზე.
„მიმდინარეობს გამოძიება, გაკეთდება მაქსიმუმი და ყველაფერი გაკეთდება იმისთვის, რომ კონკრეტული შედეგები დაიდოს უსწრაფესად“, - განაცხადა საბანაძემ.
აფეთქება დიდ დიღომში დღეს საღამოს მოხდა. შემთხვევის შედეგად სამი ადამიანი დაიღუპა, რომელთა შორის, დაუდასტურებელი ინფორმაციით, ერთი არასრულწლოვანია. ადგილზე სახანძრო-სამაშველო სამსახურის და სასწრაფო სამედიცინო დახმარების ბრიგადებია მობილიზებული, ასევე, იმყოფებიან ექსპერტ-კრიმინალისტებიც. აფეთქება ახლადაშენებული კორპუსის მეექვსე სართულზე მოხდა. დაზიანებულია ძირითადად მეექვსე სართული, თუმცა, ჩამსხვრეულია სხვა სართულებზე მინებიც. ადგილობრივების თქმით, მთელი დღის განმავლობაში გაზის სუნი იგრძნობოდა, რის გამოც გამოიძახეს „ყაზტრანსგაზის“ წარმომადგენლები, თუმცა, მათ პრობლემა ვერ შენიშნეს და ტერიტორია დატოვეს.
დიდ დიღომში, ავთანდილის ქუჩის მცხოვრებლები, "ყაზტრანსგაზს" უყურადღებობაში ადანაშაულებენ. მათი თქმით, "ყაზტრანსგაზი" კორპუსში არსებული გაზის სუნის გამო, ჯერ კიდევ დღის პირველ ნახევარში გამოიძახეს, თუმცაკომპანიის წარმომადგენლებმა რეაგირება არ მოახდინეს. აფეთქება ახლად აშენებული კორპუსის მეექვსე სართულზე მოხდა. სრულად დანგრეულია მე-6ე სართულზე მდებარე ბინა, სადაც, სავარაუდოდ აფეთქება მოხდა. აფეთქების შედეგად სამი ადამიანია დაღუპული. არიან დაშავებულებიც, რომლებიც სხვადასხვა დაზიანებებით საავადმყოფოებში არიან გადაყვანილები. აფეთქების ადგილზე შინაგან საქმეთა სამინისტროს კრიმინალისტიკურის მოძრავი ლაბორატორია შევიდა. ადგილზე ექსპერტ კრიმინალისტები მუშაობას დაიწყებენ. მობილიზებულია სამაშველო სამსახური, სამედიცინო ბრიგადები, რომლებსაც დაშავებულები სამედიცინო დაწესებულებებში ყოველ წუთს გადაჰყავთ.
