ფოტოგრაფი იური მეჩითოვი Al Jazeera-ს მიერ მომზადებულ ფილმში მის მიერ ნათქვამის გამო ბოდიშს იხდის. მეჩითოვმა სოციალურ ქსელში გაავრცელა ვიდეომიმართვა, რომელშიც ის საზოგადოებას ბოდიშს უხდის და აღნიშნავს, ის გულწრფელი ადამიანია და გული წუხს რომ ტკივილი მიაყენა ადამიანებს.
„ჩემო საყვარელო ხალხო, მე მინდა მოგმართოთ თქვენ და განვაცხადო, რომ მე საშინლად მტკივა გული, რომ ამდენი ტკივილი მივაყენე ჩემს თანამემამულეებს, ჩემი ასეთი განცხადებებით, რომელსაც არ ჰქონდა მიზეზი რომ მე ასეთი ტკივილი მიმეყენებინა, მაგრამ ასე მოხდა. მე არ ვეძებ არც გამართლებას, ჩემს თავში და არც ვამართლებ ჩემს თავს, რამეთუ ეს ტკივილი ნამდვილია და ეს ტკივილი მე არ მშორდება. 29 წლის წინ ეს ამბავი მოხდა, ჩემს თვალწინ ხდებოდა ყველაფერი და მე მაშინ ძალიან განვიცადე. ვიყავი უამრავ პანაშიდზე და ეს ტკივილი ახლაც შემომრჩა. სამწუხაროდ, თუნდაც იმ ჩანაწერიდან, სადაც ჩემი 30-წუთიანი ჩანაწერიდან, მხოლოდ 3 წუთი გავიდა, ყველაფერი ცოტა სხვანაირად წარმოიშვა. წარმოიშვა ძაან ცუდი შთაბეჭდილება ჩემს განწყობაზე ამ ტრაგედიის, ნამდვილი ტრაგედიის მიმართ, სადაც სხვათა შორის, ჩემი კინოსტუდიის თანამშრომლის შვილი დაიღუპა. იქ იყო უამრავი წუხილი გამოთქმული ამ ტრაგედიის მიმართ, რადგან მოწმე ვიყავი და მე ვხედავდი იმ ადამიანებს. ყველაზე საშინელება ის არის, რომ ჩემ გადაღებულ სურათებში მოხვდა ერთი ადამიანი, რომელიც მერე მე შევნიშნე და მივხვდი, რომ მის ადამიანი ზის ჩაფიქრებული და შემძრა ამ სურათმა, იმიტომ რომ გავაცნობიერე, რომ დღენახევარში ის ადამიანი ცოცხალი არ იქნებოდა. მაგრამ ეს ყველაფერი დარჩა კადრს მიღმა, მთელი ეს ჩემი წუხილი მთელი ეს ჩემი ცრემლი და გოდება და ნუ, დარჩა ის რაც დარჩა. იმიტომ რომ კინო არის ეს და ფილმი და ზოგი რამ სხვა რამეს ემსახურება, არ ვიცი. ასეც ხდება რომ ბევრს რამეს იყენებენ პოლიტიკური მიზნით, ჩვენ ვიცით რა ცუდ დროს ვცხოვრობთ, როცა ყველაფერი შეიძლება გახდეს ვაჭრობის საგანი. და მე გულწრფელი ადამიანი ვარ და მე როცა მტკივა, მე მტკივა, მე ძალიან გული მტკივა, რომ მე ტკივილი მივაყენე ადამიანებს, მათ შორის მეგობრებს, რომლებიც არც ელოდნენ, რომ ესეთი რამე მოხდებოდა და ასეთი რამე შეიძლებოდა მეთქვა. ამიტომ არ ვიცი ჩემი გულწრფელი ბოდიში თუ რაღაცნაირად შეანელებს ამ სამართლიან რისხვას, რომელიც მე ვიგრძენი და ბევრ რამეს ვიზიარებ, რომელიც იყო გამოთქმული ჩემს მიმართ, იქნება კარგი. მთავარი რაც არ უნდა გააკეთო, არ უნდა ატკინო გული ადამიანებს, ახლობლებს, მოყვარეებს, თანამემამულეებს არ უნდა აწყენინო და არ უნდა ჩააგდო ასეთ დღეში. ამიტომ ჩემი დღევანდელი მდგომარეობა არ არის სახარბიელო, რა თქმა უნდა, მაგრამ მე იმედი მაქვს, რომ გაიგებენ ჩემს მდგომარეობას და სხვანაირად, როგორც ჩვევია ქართველ ხალხს, შეხედავენ ამ მდგომარეობას. მთავარია, რომ ჩვენ ისე გავაკეთოთ და ისე მოვიქცეთ, რომ ეს ყველაფერი არ იყოს ტყუილად და ჩვენ აგვეშენებინოს ისეთი სახელმწიფო საბოლოო ჯამში, რომლითაც ჩვენ ყველა ვიამაყებთ და ვიცხოვრებთ ერთად ბედნიერად და კარგად“, - ამბობს მეჩითოვი.
ცნობისთვის, ფოტოგრაფმა იური მეჩითოვმა ტელეარხ Al Jazeera-ს მიერ მომზადებულ ფილმში განაცხადა, რომ 1989 წლის 9 აპრილს 20 ქალბატონი დაიღუპა ასფიქსიის გამო. არავინ იყო დაჩეხილი, დაჭრილი, არ იყო მკვლელობები. „9 აპრილის პროტესტის დროს შეკრებილები 13-დან 25 წლამდე ასაკის ახალგაზრდები იყვნენ ძირითადად. 90% შეიკრიბა იმიტომ, რომ მათთვის ეს ერთგვარი შოუ იყო, რომელშიც მონაწილეობდნენ. ეს შედეგი დანაშაულებრივი ქმედება იყო მათ მხრიდან, ვინც ამის ორგანიზება მოაწყო. ეს ხელისუფლების ხელში ჩაგდების გეგმა იყო. არავის უნდოდა ვინმეს მოკვლა. ისინი დაიღუპნენ პანიკური გაქცევისას, 20 ქალბატონი დაიღუპა ასფიქსიის გამო. არავინ იყო დაჩეხილი, დაჭრილი, არ იყო მკვლელობები“, - განაცხადა იური მეჩითოვმა.
მეჩითოვის ამ განცხადებამ საქართველოს მოსახლეობის გაღიზიანება გამოიწვია, რაზეც იური მეჩოთოვმა სოციალურ ქსელში განცხადებით უპასუხა და განაცხადა რომ „რაზე ედავებიან არ იცის“. „ეს ხალხი, ვინც ამ სიბინძურეებს წერს, მეტწილად დაბადებულიც არ იყო, როცა მე ეს ტრაგედია გულში გავატარე და ახლაც განვიცდი. რაზე მედავებიან, ვერ გავიგე. რა ვქნა, რომ მე ცოტა მეტი ვიცი იმის ირგვლივ, რაც მოხდა და არაერთხელ მითქვამს საჯაროდ ტელევიზიებით. ახლა რა დაკეტაკა ერთად „რუსთავი-2“- ის ერთგულ მაყურებელს? არა გცხვენიათ?“, – დაწერა სოციალურ ქსელში იური მეჩითოვმა.
