ბათუმში მაშველებმა 42 წლის მამაკაცი გადაარჩინეს. აკრძალვის და გაფრთხილების მიუხედავად, აღნიშნული ზღვაში შევიდა. ის სანაპიროდან 100 მეტრის დაშორებით ითხოვდა დახმარებას.
მაშველები წყალში თოკების მეშვეობით შევიდნენ. წყლიდან ამოსვლაში მათ მოქალაქეებიც დაეხმარნენ. როგორც საგანგებო სიტუაციების მართვის სამსახურში აცხადებენ, მამაკაცი ტალღამ მოიყოლა და თავი დაუზიანდა. ამ ეტაპზე, მის სიცოცხლეს საფრთხე არ ემუქრება.
საგანგებო სიტუაციების მართვის სამსახური შავი ზღვის სანაპიროზე დამსვენებლებს აფრთხილებს:
"დღეს, 9 აგვისტოს, ზღვაზე მოსალოდნელია 4-5-ბალიანი შტორმი, რის გამოც ბანაობა აკრძალულია. დღის განმავლობაში ტალღების სიმაღლემ შესაძლოა 1,5 მეტრიდან 3 მეტრამდე მიაღწიოს. ყურადღება მიაქციეთ ამკრძალავ ნიშნებს! გთხოვთ, დაიცვათ უსაფრთხოების წესები!", - ნათქვამია უწყების განცხადებაში.
