როჯერ ფედერერი 37 წლის გახდა. ცნობილი შვეიცარიელი პროფესიონალი ჩოგბურთელი, მსოფლიოს ყოფილი პირველი ჩოგანი როჯერ ფედერერი 1981 წლის 8 აგვისტოს დაიბადა.
ჩოგბურთელების და ექსპერტების დიდი ნაწილი მას ყველა დროის საუკეთესო ჩოგბურთელად მიიჩნევს.
ფედერერს მამაკაცთა ჩოგბურთში ყველაზე მეტი – 20 დიდი სლემის ტურნირი აქვს მოგებული. აქედან რეკორდული 8 უიმბლდონი, რეკორდული 6 ავსტრალიის ღია პირველობა (ამდენივე აქვთ როი ემერსონს და ნოვაკ ჯოკოვიჩს), 5 აშშ-ის ღია პირველობა და 1 საფრანგეთის ღია პირველობა. მან მონაწილეობა მიიღო რეკორდულ – 30 დიდი სლემის ფინალში, მათ შორის ზედიზედ 10 ფინალში 2005 წლის უიმბლდონიდან 2007 წლის აშშ-ის ღია პირველობის ჩათვლით.
შვეიცარიელს 27 მასტერსი, 20 ATP-ის მსოფლიო ტურის 500 სერიების ტურნირი და რეკორდული – 6 ATP-ის მსოფლიო ტურის ფინალი აქვს მოგებული. 2008 წლის ზაფხულის ოლიმპიური თამაშებზე, წყვილთა თანრიგში თანამემამულე სტანისლას ვავრინკასთან ერთად ოქროს მედალი მოიგო, ხოლო 2012 წლის ზაფხულის ოლიმპიური თამაშებზე ერთეულებში ფედერერი ვერცხლის მედალს დაეუფლა. შვეიცარიის სახელით 2001 და 2018 წლებში მან ჰოპმანის თასი, ხოლო 2014 წელს დეივისის თასი მოიგო. ჯამში ფედერერს კარიერაში ATP-ის 98 ტურნირი აქვს ერთეულებში მოგებული.
ATP-ის ჩოგბურთელთა რეიტინგში იგი ყველაზე დიდხანს – 310 კვირის განმავლობაში იკავებდა პირველ ადგილს, მათ შორის ზედიზედ 237 კვირის განმავლობაში, რაც რეკორდია. 2002 წლის ოქტომბრიდან 2016 წლის ნოემბრამდე, ფედერერი უწყვეტად შედიოდა მსოფლიო რეიტინგის ტოპ 10-ში. 2018 წლის თებერვალში 5 წლიანი პაუზის შემდეგ, შვეიცარიელი 36 წლის ასაკში დაუბრუნდა მსოფლიო რეიტინგში პირველ ადგილს და გახდა მამაკაცთა ჩოგბურთის ისტორიაში ყველაზე ასაკოვანი პირველი ჩოგანი.
