ხორავას ქუჩაზე მომხდარი მკვლელობის საქმის გამოძიებას შსს გადაიბარებს და საქმეს პირადად მინისტრი უხელმძღვანელებს,- ამის შესახებ განცხადება პრემიერ-მინისტრმა გიორგი კვირიკაშვილმა საგანგებო ბრიფინგზე გააკეთა.
პრემიერმა პარლამენტის წინ აქციაზე მისვლის შესახებაც ისაუბრა, სადაც მას აქციის მონაწილეებმა სიტყვით გამოსვლის შესაძლებლობა არ მისცეს და აღნიშნა, რომ ის ელოდა პროვოკაციებს.
„ხვალ დილიდან შსს დაიბრუნებს საქმეს პროკურატურისგან და ვიცე-პრემიერი, გიორგი გახარია, წაიყვანს გამოძიების პროცესს, ის იქნება ხელმძღვანელი ამ პროცესის და რა თქმა უნდა, მე ყველა ნაბიჯში ვიქნები ჩართული და გავაკონტროლებ მთლიანად პროცესს,“ - განაცხადა პრემიერმა.
ამასთან, მან განაცხადა, რომ პარლამენტში დროებითი საგამოძიებო კომისია უახლოეს პერიოდში, რიგგარეშე სესიაზე დამტკიცებდა და იმედი გამოთქვა, რომ კომისიაში უმცირესობა უმრავლესობაში იქნება. თუმცა, კანონმდებლობით ეს ისედაც გარანტირებულია.
„მე ჩემი თანამდებობდა არც ერთი ადამიანის უბედურებად არ მიღირს. როგორც კი დავრწმუნდები, რომ ჩემს მიერ თანამდებობის დატოვება წაადგება ქვეყანას, თუნდაც ოდნავ გააუმჯობესებს და განმუხტავს სიტუაციას, მე არც ერთი წამით ამ ნაბიჯის გადადგმაზე არ დავფიქრდები. დღეს ეს მომენტი არ დამდგარა და სიტუაცია არ არის“, - განაცხადა პრემიერმა.
ამასთან, მან მოკლული ბავშვების მშობლებს პირობა მისცა, რომ გამოძიების ნებისმიერ ეტაპზე მიიღებენ ინფორმაციას.
„მინდა, გარანტია მივცე დაღუპული ბავშვების მშობლებს, ოჯახის წევრებს, რომ გამოძიების ნებისმიერ ეტაპზე, ყოველდღიურად რა ხარისხითაც ისინი მოინდომებენ ინფორმაციის მიღებას და პროცესში ჩართვას, იმ ხარისხით იქნებიან ჩართული როგორც შსს-ს მიერ წარმართულ პროცესში, ასევე საგამოძიებო კომისიის მიერ წარმართულ მუშაობაში,“ - განაცხადა გიორგი კვირიკაშილმა.
პრემიერი ირაკლი შოთაძის გადადგომის შესახებ მიღებულ გადაწყვეტილებას ღირსეულ ნაბიჯად აფასებს. კვირიკაშვილი აცხადებს, რომ იუსტიციის მინისტრს უკვე მოუწოდა, საზოგადოების ფართო ფენების ლეგიტიმაციით მოხდეს ახალი მთავარი პროკურორის არჩევა.
