არცერთი ისეთი მასალა არ გამოქვეყნებულა, რომელიც წინააღმდეგობაში მოვიდოდა საქართველოს კანონმდებლობასთან, - ასე გამოეხმაურა პროკურატურის მიერ ხორავას ქუჩაზე მომხდარი მკვლელობის საქმეზე მტკიცებულებების გასაჯაროვებას საქმის პროკურორი მარიკა გოგოხია.
მისი განმარტებით, პროკურატურის მიერ გამოქვეყნებული მასალით არასრულწლოვანთა მართლმსაჯულების კოდექსი არ დარღვეულა.
"მთავარ პროკურატურაში გამართული ბრიფინგის მიზანი იყო საზოგადოებისთვის, რომლის მხრიდან ამ საქმისადმი მაღალი ინტერესი არსებობს, ნათელი ყოფილიყო ის გარემოებები, რომელიც არის სისხლის სამართლის საქმეში. არსებობს არასრულწლოვანთა მართლმსაჯულების კოდექსი, რომელიც ადგენს უშუალოდ არასრულწლოვნებთან მიმართებით არსებულ რეგულაციებს. ამ კოდექსიდან გამომდინარე არანაირ დარღვევას ადგილი არ ჰქონია, ჩვენი მხრიდან. არ გამოქვეყნებულა ნებისმიერი კადრი, გამოქვეყნდა მტკიცებულებების ნაწილი, რომელიც საზოგადოებისთვის იყო საინტერესო.
არსებობს საქმის მასალების ნაწილი რომლის გასაჯაროებაც არაა მიზანშეწონილი, თუმცა დღეს არ გასაჯაროვებულა არცერთი ისეთი მასალა, რომელიც წინააღმდეგობაში მოვიდოდა საქართველოს კანონმდებლობასთან და არ დარღვეულა არცერთი ნორმა", - დასძენს გოგოხია.