ბრალდების მხარეს სურს, გარკვეული პიარი გააჩაღოს და საზოგადოება დაარწმუნოს მათი პოზიციის მართებულობაში - ასე გამოეხმაურა პროკურატურის მიერ ხორავას ქუჩაზე მომხდარი მკვლელობის საქმეზე მტკიცებულებების გასაჯაროვებას, ერთ-ერთი ბრალდებულის ადვოკატი, ტარიელ კაკაბაძე.
"ბრალდების მხარემ მასალები, საქმეში არსებული მტკიცებულებები გამოაქვეყნა და გვეუბნება, თითქოს, ექსპერტმა თქვა, ეს იყო მაკრატლით მიყენებული ჭრილობები. რადგან ეს გამოაქვეყნა, მაშინ ბრალდების მხარემ ისიც გამოაქვეყნოს, სადაც ექსპერტი ამბობს, რომ მაკრატლით არის ჭრილობები მიყენებული. ასეთ რამ ექსპერტს არსად უთქვამს. ექსპერტმა უბრალოდ შესაძლებლობა დაუშვა, რომ მაკრატლის მსგავსი საგნით შეიძლებოდა ყოფილიყო ჭრილობა მიყენებული. ბრალდების მხარეს საზოგადოება შეცდომაში შეჰყავს.
ვიმეორებ, ექსპერტს არსად არ უთქვამს, რომ გამოყენებულია მაკრატელი, არც დასკვნაში წერია მსგავსი რამ, არც ინტერვიუს დროს უთქვამს მსგავსი რამ, არც სასამართლოში დაკითხვის დროს უთქვამს. ექსპერტმა თქვა, ასეთი რამ, გამოყენებულია სხვადასხვა საგნები, რომელებიც არ არის დანა, გამოყენებულია სხვადასხვა მჭრელი ბასრი საგნები, რომლებიც კატეგორიულად ვაცხადებ, საქმეში არსებული დანები არ არისო. თუმცა, ამ საგნებში შესაძლებელია რომელიმე მაკრატლის მსგავსი საგანი იყოსო, ეს თქვა ექსპერტმა. აპრიორი, საქმეში მაკრატელია გამოყენებულიო, ასეთი რამ ექსპერტს არსად უთქვამს. ბრალდების მხარის განმარტებები აღნიშნულთან დაკავშირებით, მიზნად ისახავს რომ საზოგადოება შეცდომაში შეიყვანოს. დარწმუნებული ვარ, ბრალდების მხარემ კარგად იცის რა თქვა ექსპერტმა, თუმცა, განმარტებებს შეგნებულად არასწორად აკეთებენ, რათა სურთ გაამართლონ თავიანთი არასწორად გამოძიებული სისხლის სამართლის საქმე", - აცხადებს კაკაბაძე.
მისი განმარტებით, აღნიშნული მასალების გასაჯაროვების უფლება პროკურატურას არ ჰქონდა.
"რაც შეეხება სიახლის სამართლის საქმის მასალების გამოქვეყნებას, ამის უფლება არც ბრალდების მხარეს არ ჰქონდა, არც დაცვის მხარეს არ აქვს. საქმეში იმდენი მტკიცებულება, იმდენი ჩვენება არსებობს, სადაც ერთი და იგივე მოწმე სამჯერ ცვლის ერთი და იგივე ჩვენებას, შემდეგ სასამართლოში კიდევ რამდენჯერმე სრულიად განსხვავებულ ინფორმაციას აწვდის სასამართლოს, ჩვენც შეგვეძლო აღნიშნული გამოგვექვეყნებინა, საზოგადოებისთვის გვეჩვენებინა, მაგრამ ეს იმიტომ არ გავაკეთეთ, არ გვსურდა კანონი დაგვერღვია. ამ ყველაფერს საზოგადოების მხრიდან ძალიან მძიმე რეაქცია მოჰყვებოდა.
თუმცა, ბრალდების მხარეს არ აინტერესებს არღვევს თუ არა კანონს და სურთ, გარკვეული პიარი გააჩაღონ და საზოგადოება დაარწმუნონ მათი პოზიციის მართებულობაში. თუმცა, საზოგადოებამ უკვე კარგად დაინახა, რომ ბრალდების მხარის პოზიცია სრულიად უსაფუძვლოა. რაც მთავარია, დაზარალებულმა ძალიან კარგად დაინახა, რომ ბრალდების პოზიცია ფაქტებს, მტკიცებულებებს არ ეფუძნება და ძალიან შორს არის ჭეშმარიტებისგან", - დასძენს კაკაბაძე.