პროკურატურის მიერ ხორავას ქუჩაზე მომხდარი მკვლელობის საქმეზე ნივთმტკიცებების გასაჯაროვებას გამოეხმაურა.
მოკლული დავით სარალიძის მამა, ზაზა სარალიძე.როგორც ის განმარტავს, აღნიშნული ფაქტი საზოგადოების შეცდომაში შეყვანას ემსახურება.
"ხალხი უნდათ დააბნიონ, აი ჩვენ გავასაჯაროვეთ მასალებიო. ჩემი შვილის ტანსაცმელს ვითხოვ, რომელიც არ სჭირდებათ და არ მაძლევენ. ფარდული გაანადგურეს. რატომ? გამოვიდეს შოთაძე და გამცეს პასუხი, რატომ გაანადგურეს ფარდული, რომელიც მთავარი ნივთმტკიცება იყო. რატომ გაღუნეს დანა, რომლითაც ექსპერტიზის ჩატარება აღარ შეიძლება? რატომ არ მოიტანა სამხარაულის ექსპერტმა დასურათებული დასკვნები, რაც მაია ნიკოლეიშვილმა გააკეთა? გამცეს ამაზე პასუხი, ესეც არასრულწლოვნებია? ზოგადი კითხვებია და გამცეს საჯაროდ პასუხი.
კითხვა დამისვეს, დაზარალებულის სტატუსის მონიჭებისას, თქვენ გცნოთ დაზარალებულად, თუ თქვენი მეუღლე? რას ნიშნავს ეს კითხვა ვერ მივხვდი. ალბათ, ჩემი მეუღლე დაზარალებული არაა. დაზარალებულის სტატუსის მინიჭების დღიდან, მოვითხოვე ჩემი შვილის საფულე. რამდენჯერმე მივმართე ზვიად ფხაკაძესაც კი, თუ არ არის საჭირო გამოძიებისთვის, დამიბრუნეთ-მეთქი. მითხრეს, რომ ეს გამოძიებას სჭირდება, ვერ დაგიბრუნებთო.
დღეს, ჩემი შვილის შარვალი და ტანსაცმელი, რომელიც მე პირადად არ მინახავს, საჯარო გახადეს?! ტაშს დავუკრავ, მალადეც, მაგრები ყოფილან! მეტი რა განაცხადი გავაკეთო? ესენი არიან მართლა უსუსურები და არაადამიანები! მაქსიმალურად ცდილობენ, მხოლოდ ეს ორი ბრალდებული დასაჯონ. არიან კიდევ სხვა დამნაშავეები და გამოიყვანონ სულყველა გარეთ სანამ ჩემი ზომებისთვის მიმიმართავს", - აცხადებს სარალიძე.