27 მაისს 15:00 საათზე გოეთეს ინსტიტუტში „გერმანული ენის თვის“ ფარგლებში
გაიმართება თავისუფალი საბავშვო თეატრის "აიწონა-დაიწონა" სპექტაკლი „შავი ნისლი" ჰაერის დაბინძურებისა და გარემოს დაცვის თემაზე. სპექტაკლის რეჟისორია მარაიკე ვენცელი, ფოლკერ ლუდვიგის სცენარი თამთა მელაშვილმა თარგმნა.
„აიწონა-დაიწონა“ თავისუფალი საბავშვო თეატრია, რომელიც 2016 წელს ბერლინელი მსახიობისა და რეჟისორის მარიკე ვენცელის მიერ დაარსდა ქართველ მსახიობებთან ლილი მამულაშვილთან, მარიამ გაბრიჩიძესთან და ნათია ქავთარაძესთან ერთად. მათი საქმიანობა მსოფლიოში აღიარებული ბერლინის GRIPS-ის ცნობილი თეატრის პრინციპებზეა დაფუძნებული. ამ კონცეფციის მიხედვით თეატრის მიზანია სოციალური და პოლიტიკური პრობლემების ახსნა, მაყურებელში სოლიდარობის გრძნობის გაღვიძება და ცვლილების მუხტის გაჩენა.
ინფორმაცია ვებ-გვერდზე:
https://www.goethe.de/ins/ge/ka/spr/unt/for/gia/kal.cfm?fuseaction=events.detail&event_id=21264391
სპექტაკლის დასრულებისთანავე შედგება დისკუსია-ვორქშოპი გარემოსდაცვისა და ნარჩენების გადამუშავების საკითხებზე/
ყოველწლიური პროექტი „გერმანული ენის თვე“ სლოგანით „სამი ქვეყანა - ერთი ენა“ 15 მაისიდან 17 ივნისამდე გერმანიის, ავსტრიისა და შვეიცარიის საელჩოების ორგანიზებით უკვე მეექვსედ იმართება. მისი მიზანია გერმანული ენისა და გერმანულენოვანი ქვეყნების მდიდარი კულტურის მიმართ საზოგადოების ინტერესის გაზრდა. ერთი თვის განმავლობაში როგორც თბილისში, ასევე საქართველოს რეგიონებში იმართება მოხსენებები, კინო-ჩვენებები, ლიტერატურული, საინფორმაციო და სპორტული ღონისძიებები, რაც კიდევ უფრო გაზრდის იმ შესაძლებლობებს, რასაც ეს ქვეყნები სტიპენდიების, ბიბლოთეკებისა თუ საგრანტო პროგრამების სახით დაინტერესებულ პირებს სთავაზობენ
