მადლობა მინდა ვუთხრა ახალგაზრდებს, ვინც ადეკვატურად უპასუხეს მიტინგზე შსს-ს მინისტრისა და თბილისის მერის მისვლას და ერთადერთი გონივრული და პასუხისმგებლიანი გადაწყვეტილება მიიღეს - აქციის დაშლისა და მსჯელობის სამუშაო ფორმატში გადატანის შესახებ, - ამის შესახებ მმართველი გუნდის წევრმა რატი იონათამიშვილმა გუშინდელ მოვლენებთან დაკავშირებით განაცხადა.
მისი თქმით, გუშინდელმა დღემ მკაფიოდ ცხადყო, რომ ქვეყანას ყავს ძლიერი სახელმწიფო ინსტიტუტები და ადამიანის უფლებებზე მზრუნველი მთავრობა.
"ქართული საზოგადოება ორი დღის მანძილზე აღელვებული ადევნებდა თავს რუსთაველის გამზირზე განვითარებულ მოვლენებს. თითოეული ჩვენგანისთვის მნიშვნელოვანი იყო, რომ დაგვეცვა ჩვენი მოქალაქეების უსაფრთხოება და არ შეზღუდულიყო აზრის გამოხატვის თავისუფლება. კონტრაქციის ორგანიზების შემდეგ, სიტუაცია მნიშვნელოვნად დაიძაბა და სწორედ ამ დროს უნდა გამოჩენილიყო ჩვენი ხელისუფლების გონივრულობა და კეთილგონიერება. ამიტომ, განსაკუთრებულად ამაღელვებელი იყო შსს-ს მინისტრის გიორგი გახარიას მიტინგზე მისვლა და სიტყვით გამოსვლა, რითაც განიმუხტა სიტუაცია და რამდენიმე წუთის შემდეგ, მას ტაშს უკრავდნენ ისინი, ვინც მანამდე მის გადადგომას ითხოვდნენ. ასევე, მადლობა მინდა ვუთხრა ახალგაზრდებს, ვინც ადეკვატურად უპასუხეს მიტინგზე შსს-ს მინისტრისა და თბილისის მერის მისვლას და ერთადერთი გონივრული და პასუხისმგებლიანი გადაწყვეტილება მიიღეს - აქციის დაშლისა და მსჯელობის სამუშაო ფორმატში გადატანის შესახებ.
ჩვენთვის მნიშვნელოვანია, რომ თითოეული მოქალაქის პოზიცია და მოსაზრება იყოს დაცული და მოსმენილი და არავის გაუჩნდეს ჩვენს ქვყანაში გარიყულობის, ან უსამართლობის განცდა.
ჩვენ უმთავრესი ღირებულება - ჩვენი სამშობლოს სიყვარული გვაერთიანებს და როგორც არ უნდა განვსხვავდებოდეთ ერთმანეთისგან, საერთო ყოველთვის უფრო მეტი გვექნება", - განაცხადა რატი იონათამიშვილმა.
