არ მესმის, რატომ ჩავაყენეთ ის ახალგაზრდები ამ მდგომარეობაში, რომლებიც საცეკვაოდ იყვნენ მისულნი ან პოლიცია რატომ ჩავაყენეთ ამ სიტუაციაში, - ამის შესახებ „ღამის თბილისის ეკონომიკის“ ხელმძღვანელმა სერგი გვარჯალაძემ განაცხადა, რომელიც პარლამენტის შენობასთან მივიდა.
მისი თქმით, ასეთი სიტუაცია არავისთვის არის მომგებიანი, მეტიც, დამაზიანებელია ქვეყნისთვის.
„ძალიან ცუდად წარმოაჩენს ჩვენს ქვეყანას. ასეთი სიტუაცია არავისთვის არის მომგებიანი, მეტიც, დამაზიანებელია ქვეყნისთვის. ეს არის ის სფერო, რომელშიც ქვეყანამ ბოლო ხუთი წლის განმავლობაში გაითქვა სახელი. დარწუნებული ვარ აქ მყოფთაგან 90%-ზე მეტი ნარკოტიკების მომხრე არ არის და ასეთი მოპყრობა არ შეიძლება. ეს არის ძალიან წამგებიანი პოზიცია. მაქსიმალიურად უნდა შევეცადოთ, რომ მოვერიდოთ პროვოკაციას. არ მესმის, რატომ ჩავაყენეთ ის ახალგაზრდები ამ მდგომარეობაში, რომლებიც საცეკვაოდ იყვნენ მისულნი ან პოლიცია რატომ ჩავაყენეთ ამ სიტუაციაში“, - განაცხადა სერგი გვარჯალაძემ.
შეგახსენებთ, შსს-ს ინფორმაციით, კლუბებში საგამოძიებო მოქმედებები მიმდინარეობს.
მათივე ცნობით, „ბასიანსა“ და „გალერიში“ დაკავებულია ნარკოტიკული საშუალების გამსაღებელი 8 პირი.
კლუბებში „ბასიანსა“ და „გალერიში“ სამართლდამცველები რამდენიმე საათის წინ შევიდნენ.
არაოფიციალური ინფორმაციით, დაკავებულია 50-მდე ადამიანი.
