„რაც შეეხება საუბარს ძველებზე და ახლებზე, ეს არის მხოლოდ და მხოლოდ სპეკულაციები და ამას არ აქვს არანაირი საფუძველი“, - ეს განცხადება პარლამენტის თავმჯდომარემ, ირაკლი კობახიძემ, “ქართული ოცნების“ ყრილობის დასრულების შემდეგ ჟურნალისტებთან გააკეთა.
მისი თქმით, გუნდში მხოლოდ მცირე გადაცდომები იყო, კონკრეტული დეპუტატების მხრიდან, სადაც ე.წ. ძველებიც არიან და ახლებიც. ამიტომ ძველები-ახლების პრინციპით დაყოფას „სპეკულაციას“ უწოდებს. თუმცა, „ჯი-ეიჩ-ენ-ის“ კითხვა, მაშინ რა პრინციპით მოხდა „ქართული ოცნების“ გუნდის დაყოფა, უპასუხოდ დატოვა.
"მე გახლავართ პარტიის დამფუძნებელი. 2011 წლიდან, აქტიურად ვიყავი ჩართული "ქართული ოცნების" ჯერ კიდევ საზოგადოებრივი მოძრაობის მუშაობაში და 2015 წლის დასაწყისიდან ვიკავებ პარტიაში მაღალ თანამდებობას. ვიყავი აღმასრულებელი მდივანი, მუნიციპალური არჩევნებისას შტაბის უფროსი. აქედან გამომდინარე, მე ახლად ვერანაირად ვერ ჩავითვლები. რაც შეეხება ჩემს პარტიულ გამოცდილებას, მე ვარ პარტიის ერთ-ერთი უძველესი წევრი, შესაბამისად, რაც შეეხება საუბარს ძველებსა და ახლებზე, ეს არის მხოლოდ და მხოლოდ სპეკულაციები და ამას არ აქვს არანაირი საფუძველი. რეალურად არანაირი დაყოფა ძველებსა და ახლებს შორის არ არსებობს. გუნდი არის ერთიანი. იყო მცირე გადაცდომები კონკრეტული დეპუტატების მხრიდან. ამ დეპუტატებს შორის ზოგი ახალი იყო, ზოგი ძველი და არანაირ კავშირში არ არის ეს პარტიაში გაწევრიანების მომენტთან. რამდენიმე დეპუტატმა არასწორი განცხადება გააკეთა. ეს იყო და ეს. ეს არის მცირე გარკვეული პრობლემა და ბატონი ბიძინა ივანიშვილის პოლიტიკაში დაბრუნებისთანავე მყისიერად მოგვარდა პრობლემა", - განაცხადა ირაკლი კობახიძემ.