სიახლე არაფერი არაა, გარდა იმისა რომ ფარაონი გამოჩნდა, - ამის შესახებ "ევროპული საქართველოს" ერთ-ერთმა ლიდერმა გიგა ბოკერია ბიძინა ივანიშვილის გამოსვლის შეფასებისას განაცხადა.
მისი თქმით, ივანიშვილის გამოსვლა მოიცავდა წარსულის და ოპონენტების ლანძღვას, საკუთარი თავის ქებას და რუსეთთან ურთიერთობის გაუმჯობესებაზე უტიფარ განცხადებას.
"მას არ აქვს მომავლის და ქვეყნის წინსვლის არანაირი ხედვა, არ იცის როგორ უნდა გამოვიდეთ ამ ჩიხიდან, რომელშიც მის გამო მოვხვდით. ევროპული საქართველო არაფერს სასიკეთოს ამ ცვლილებებიდან არ ელის. ჩვენი ეროვნული ამოცანა უნდა ამ კაცის და მისი გუნდის წასვლა ხელისუფლებიდან მშვიდობიანად და არჩევნების გზით.
ივანიშვილს აქვს ილუზია, რომ ამ კომუნისტური მოდელის შემოტანით, როცა პარტიის უფროსი არის პრემიერ მინისტრის ხელმძღვანელი და ყველა ინსტიტუტზე მაღლა მდგომი, უშველის არაფორმალურ მმართველობას, რაზეც ყველა საერთაშორისო დამკვირვებელი მიუთითებს. ჩვენი ქვეყნისთვის ამას არსებითი მნიშვნელობა არ აქვს რა ხდება ივანიშვილის თავში. არსებითი მნიშვნელობა აქვს როდის დავამთავრებთ ამ პოლიტიკურ უბედურებას არჩევნების გზით", -განაცხადა გიგა ბოკერიამ.
ცნობისთვის, ბიძინა ივანიშვილი პარტია „ქართული ოცნება-დემოკრატიული საქართველოს“ თავმჯდომარედ დღეს პარტიის მეხუთე ყრილობაზე აირჩიეს.