"საქმე უდანაშაულო ადამიანს ეხება, შესაბამისად, იმის სურვილი რომ გიორგი გიორგანაშვილი სასჯელაღსრულების დაწესებულებაში კიდევ თვეების განმავლობაში იყოს, არ გვაქვს", - განაცხადა "ბახალას" ადვოკატმა, გიორგი მახარაძემ მას შემდეგ, რაც ბრალდების მხარემ განაცხადა,რომ პროცესის გადადება საქმის გაჭიანურებას ემსახურება.
"დღეს თქვენ თვითონაც მომსწრე იყავით, თუ როგორ ცდილობს ბრალდების მხარე ყველაფერი გააკეთოს იმისთვის, რომ ობიექტური ჭეშმარიტების დადგენა არ მოხდეს. ჩვენ მარტივ რამეს ვითხოვდით, მოწმეები რომლებიც დაიკითხნენ, კიდევ ერთხელ დაკითხულიყვნენ. სასამართლომ ამ შუამდგომლობაზე უარი გვითხრა. რაც შეეხება მეორე საკითხს, პროკურატურიდან გამოძიების საქმის მასალების გამოთხოვას, სასამართლომ გვითხრა, რომ გამოძიების შედეგებს უნდა დაველოდოთ და საქმის მასალებს შემაჯამებელ გადაწყვეტილებასთან ერთად უნდა დავურთოთ. ეს სასამართლოს მხრიდან პრაქტიკულად უარის თქმას ნიშნავს. ამ შუამდგომლობებზე უარის თქმა ქართული მართლმსაჯულებისთვის ცუდი ფაქტია, ვინაიდან აღნიშნული შუამდგომლობები მხოლოდ და მხოლოდ ობიექტური ჭეშმარიტების დადგენის კიდევ უფრო მეტ შესაძლებლობას გვაძლევდა. საქმის გაჭიანურება ჩვენს ინტერესებში რომ არ არის, ეს დღესავით ნათელია. ჩვენი ინტერესია, რაც შეიძლება სწრაფად დასრულდეს ეს პროცესი, ვინაიდან ვინაიდან საქმე უდანაშაულო ადამიანს ეხება, შესაბამისად, იმის სურვილი რომ გიორგი გიორგანაშვილი სასჯელაღსრულების დაწესებულებაში კიდევ თვეების განმავლობაში იყოს, არ გვაქვს", - აცხადებს მახარაძე.
შემდეგი პროცესი 15 მაისს, 12:30 საათზე ჩაინიშნა.
