უნივერსიტეტის მაღლივ კორპუსთან საფეხმავლო ხიდი სარეაბილიტაციო სამუშაოების გამო 4 თვით გადაიკეტა. აღნიშნული სამუშაოებიდან გამომდინარე, ბაგებიდან მაღლივ კორპუსამდე ავტობუსების დროებითი მარშრუტი დაინიშნა. სამი ავტობუსი ხიდის რეაბილიტაციის პერიოდში უფასოდ იმოძრავებს და მხოლოდ სტუდქალაქთან და მაღლივ კორპუსთან გაჩერდება.
დედაქალაქის მერი კახა კალაძე უნივერსიტეტის მაღლივ კორპუსთან მდინარე ვერეზე მდებარე საფეხმავლო ხიდის რეაბილიტაციის სამუშაოებს ადგილზე გაეცნო. კახა კალაძის თქმით, ხიდს, რომელიც აშენების შემდეგ არასოდეს შეკეთებულა, კაპიტალური რეაბილიტაცია ჩაუტარდება.
„ჩვენ დავიწყეთ სარეაბილიტაცო სამუშაოები ამ საფეხმავლო ხიდზე, რომელიც ბაგებსა და მაღლივ კორპუსს ერთმანეთთან აკავშირებს. ხიდს აშენების შემდეგ რეაბილიტაცია აქამდე არასოდეს ჩატარებია. ჩვენ აქ კაპიტალურ სარეაბილიტაციო სამუშაოებს ჩავატარებთ, რაც, დაახლოებით, 4 თვის განმავლობაში გაგრძელდება. ამასთან, რადგან აღნიშნული ხიდით ძალიან ბევრი ადამიანი სარგებლობს, ჩვენ მივიღეთ გადაწყვეტილება, გამოვყოთ სამი ავტობუსი, რომელიც ყოველგვარი ანაზღაურების გარეშე მოემსახურება მათ, ვინც ამ ხიდის მეშვეობით გადმოდის ბაგებიდან მაღლივის მიმართულებით და პირიქით. რეაბილიტაციის დასრულებამდე ეს ავტობუსები 10-წუთიანი ინტერვალებით იქნება მათ სამსახურში" - განაცხადა კახა კალაძემ.
საფეხმავლო ხიდის რეაბილიტაცია-რეკონსტრუქცია პროექტის მიხედვით მოიცავს ხიდზე არსებული საფარის გამოცვლას, ბურჯების გამაგრებას, გარდამავალი ფილის განახლებას, მოაჯირების შეღებვასა და განათების სისტემის რეაბილიტაციას.
სარეაბილიტაციო სამუშაოებს ინფრასტრუქტურის განვითარების საქალაქო სამსახურის ტენდერში გამარჯვებული კომპანია შპს „გრუპო პონტე“ აწარმოებს.
სამუშაოები 4 თვეს გაგრძელდება და მისი ღირებულება 515 515 ლარია.
თბილისის მერთან ერთად ხიდის რეაბილიტაციის ადგილზე იმყოფებოდნენ მერის მოადგილე ირაკლი ბენდელიანი, ვაკის რაიონის გამგებელი ნოდარ ტურძელაძე და მერიის ტრანსპორტის საქალაქო სამსახურის უფროსი მამუკა მუმლაძე.
