ჟენევის თანათავმჯდომარეები ცხინვალში სავარაუდოდ, დღეს ჩადიან, - ამის შესახებ საქართველოს საგარეო საქმეთა მინისტრის პირველმა მოადგილე დავით ზალკალიანმა განაცხადა.
მისი თქმით, ჟენევის თანათავმჯდომარეები არჩილ ტატუნაშვილის საქმეზე ინფორმირებულნი არიან.
„ჩვენი მხრიდან ყველა მხარე ინფორმირებულია, მათ შორის ჟენევის თანათავმჯდომარეები, რომლებიც თბილისში იმყოფებოდნენ.
გუშინ მათთან საგარეო საქმეთა სამინისტროში შეხვედრა შედგა და სწორედ არჩილ ტატუნაშვილზე იყო საუბარი.
ყველა დაინტერესებული მხარე ჩართულია და ჩვენ ველოდებით, შესაბამისი გადაწყვეტილება რაც შეიძლება სწრაფად იყოს მიღებული. ჟენევის თანათავმჯდომარეები ცხინვალში სავარაუდოდ დღეს ჩადიან“, – განაცხადა დავით ზალკალიანმა.
შეგახსენებთ, 22 თებერვალს, საოკუპაციო რეჟიმმა საქართველოს მოქალაქეები - არჩილ ტატუნაშვილი, ლევან ქუტაშვილი და იოსებ პავლიაშვილი ახალგორში დააკავა. 23 თებერვალს კი გავრცელდა ინფორმაცია, რომ არჩილ ტატუნაშვილი გაურკვეველ ვითარებაში გარდაიცვალა.
ცნობისთვის, ფრაქცია „ქართული ოცნების“ თავმჯდომარე მამუკა მდინარაძის განცხადებით, ის არ გამორიცხავს, რომ ტატუნაშვილის საქმეზე ოპოზიცია და მმართველი გუნდი საერთო დოკუმენტზე შეჯერდნენ.
ერთ-ერთი ვერსიით, ტატუნაშვილის გარდაცვალებასთან კავშირი ახალგორის ადმინისტრაციის უფროსს, ფილიპ ხაჩიროვს აქვს, თუმცა მან ეს ინფორმაცია უარყო.
ამავე საკითხზე, „ევროპული საქართველო“ ე.წ მაგნიცკის სიის ანალოგის, ოთხოზორია-ტატუნაშვილის სიის შექმნას ითხოვს.
საქართველოს საპატრიარქომ გაავრცელა ინფორმაცია, რომ არჩილ ტატუნაშვილის ცხედარს ოჯახს სავარაუდოდ, დღეს ან ხვალ დაუბრუნებენ.