20 წლის ანა ნაცვლიშვილის მკვლელობაში ბრალდებულის ახლო ნათესავი და მეგობარი „ჯი-ეიჩ- ენ-თან“ საუბარში გამორიცხავს რომ გოგონა ლადო გრიგალაშვილის მოკლულია. ის საუბარში საეჭვო გარემოებებზეც მიუთითებს.
„აღნიშნულ საქმესთან დაკავშირებით ძალიან ბევრი არასწორი ინფორმაცია გავრცელდა. მათ შორის ისიც, რომ თითქოს ეს მკვლელობა იმ ავტოსაგზაო შემთხვევას უკავშირდება, რომელიც ლადოს დაახლოებით 8 თვის წინ შეემთხვა. ეს სრული აბსურდია. ავარია ლადოს ნამდვილად შეემთხვა, თუმცა მას არავინ გაუტანია. მწვანეზე მიმავალს, წითელზე მანქანამ გზა გადმოუჭრა, რომელში მყოფი ქალბატონიც გარდაიცვალა. ლადო ამ ქალის სამძიმარზეც კი იყო მოსული.
აღნიშნულ ავარიაში ლადოს ბრალეულობა არ დადგინდა, რადგან თავის გზაზე მიდიოდა.
გავრცელდა ასევე ინფორმაცია, რომ ლადო ანას ყოფილი შეყვარებული იყო. ესეც სიცრუეა. ანა მისი საცოლე იყო. უახლოეს მომავალში ცოლად უნდა მოეყვანა, სამსახურს ელოდებოდა. მათ ერთმანეთი 6 წელი უყვარდათ“ - აღნიშნავს ბრალდებულის ნათესავი.
როგორც ის განმარტავს, შეყვარებულებს ერთმანეთთან კონფლიქტი მოსდიოდათ, თუმცა ამას სერიოზული სახე არასდროს ჰქონია.
„რაღაც პერიოდიო ერთმანეთს შეიძლებოდა გაბუტვოდნენ, თუმცა ძალიან ელემენტარულ რაღაცეებზე. როცა ახალი ნაჩხუბრები იყვნენ ერთხელ ანამ თქვა, შერიგება მე რომ არ მეთხოვა ამას არც გავახსენდებოდიო“ - აცხადებს ბრალდებულის ნათესავი.
„ანას რაც არ უნდა დაეშავებინა, არ არსებობს, გამორიცხულია რომ ის ლადოს მოეკლა. ის ასეთი ადამიანი არ არის. სხვა რაღაცას გააკეთებდა, მაგრამ ანას არ მოკლავდა. თუ ვის შეიძლებოდა მოეკლა ანა, ამაზე ვერსია არ გამაჩნია. შემთხვევის დროს ლადოსთან ერთად არ ვყოფილვარ, ამიტომ ვერ გეტყვით სად იყო. ანა 6-ის ნახევარზეა მოკლული. ნახევარ საათში ფიზიკურად არ შეეძლო ადამიანი მოეკლა. გამქრალიყო, ეს ყველაფერი დაემალა და ბოლოს მამამისთან ერთად ეძებნა მოკლული. ერთადერთი და მთავარი კითხვა გვაქვს თუ ვინ მოკლა ანა. ამ ყველაფერს ძალიან მალე გამოძიება დაადგენს“ - აცხადებს გრიგალაშვილის ნათესავი.
შეგახსენებთ, რომ 20 წლის ანა ნაცვლიშვილის ცხედარი პოლიციამ 22 თებერვალს თბილისში, თემქის დასახლებაში იპოვა. მას თავისა და კისრის არეში შვიდი ჭრილობა ჰქონდა მიყენებული.
საქმის ძიება სისხლის სამართლის კოდექსის 108-ე მუხლით მიმდინარეობს, რაც განზრახ მკვლელობას გულლისმობს. მომხდართან დაკავშირებით, დაკავებულია 20 წლის ლადო გრიგალაშვილი.
შსს-ს ინფორმაციით, მკვლელობა შურისძიების ნიადაგზე მოხდა. დაკავებული ბრალს არ აღიარებს და დუმილის უფლებას იყენებს. თბილისის საქალაქო სასამართლომ ბრალდებულს აღკვეთის ღონისძიების სახით წინასწარი პატიმრობა შეუფარდა.
