„ბაქრაძის არაერთ ტყუილზე დოკუმენტებს გავავრცელებ. ბაქრაძის ტყუილის საპირისპირო დოკუმენტებს დავდებ, რომელიც პროკურატურიდანაა ამოღებული“, - განუცხადა „ჯი-ეიჩ-ენს“ შსს-ს პრესსმსახურის ყოფილმა უფროსმა, გურამ დონაძემ.
ის კრიმინალური პოლიციის ყოფილი უფროსის, ზურაბ ბაქარაძის ბრალდებებს დღეს 13:00 საათზე განცხადებით უპასუხებს.
„პირველ საათზე საგანგებო განცხადებებს გავაკეთებ, ვიტყვი ყველაფერს, თუ რა ხდება“, - აცხადებს დონაძე.
ცნობისთვის, ბუტა რობაქიძის საქმეზე ერთ-ერთმა ბრალდებულმა, ზურაბ ბაქრაძემ მედიასთან განაცხადა, რომ რობაქიძის მკვლელობის ადგილი გაყალბებულია და ამაში მონაწილეობა მანაც მიიღო. მან გურამ დონაძე და საპატრულო პოლიციის ყოფილი ხელმძღვანელი ზურაბ მიქაძე შანტაჟში დაადანაშაულა. მან აღიარა, რომ 2004 წელს რობაქიძის მკვლელობის შემდეგ შემთხვევის ადგილზე იარაღები მიიტანეს. მისი თქმით, იარაღები შემთხვევის ადგილზე მიქაძემ მიიტანა. ასევე ბაქრაძე ამბობს, რომ რეალობის ამსახველი ვიდეოჩანაწერი, სადაც ჩანს, რომ იარაღები შემთხვევის ადგილზე არ არის, გურამ დონაძესთან ინახება.
შეგახსენებთ, ბუტა რობაქიძის მკვლელობის საქმეზე სამსახურებრივი უფლებამოსილების ბოროტად გამოყენებას შსს ყოფილ მაღალჩინოსნებს ედავებიან. აღნიშნულზე ბრალდებულია 5 პირი: გურამ დონაძე, ირაკლი ფირცხალავა, ზურაბ ბაქრაძე, დავით იაშვილი და ზურა მიქაძე.
