„ზურაბ ბაქრაძეს პროკურატურა შეპირდა, თუ ჩვენ ხელს დაგვადებდა, ხელს ჩემსკენ გამოიშვერდა, მას საპროცესო გარიგებას გაუფორმებდნენ. როგორც ხდება, პროკურატურამ ეს ადამიანი „დაკერა“, - ასე პასუხობს „ჯი-ეიჩ-ენთან“ კრიმინალური პოლიციის ყოფილი უფროსის, ზურაბ ბაქრაძის განცხადებას გურამ დონაძე.
ბუტა რობაქიძის საქმეზე ერთ-ერთმა ბრალდებულმა, ზურაბ ბაქრაძემ მედიასთან განაცხადა, რომ რობაქიძის მკვლელობის ადგილი გაყალბებულია და ამაში მონაწილეობა მანაც მიიღო. მისი თქმით, ფირი, რომელიც ტრიალებს ამდენი ხნის განმავლობაში, არის მონტაჟი. ბაქრაძე აცხადებს, რომ ნამდვილი ფირი არის გურამ დონაძესთან და ამ ფირით მთელი 8 თვის განმავლობაში განიცდის შანტაჟს.
„იტყუება! რაში მიიღო მონაწილეობა, სად, როგორ, რა ჩანს, ამას საზოგადოება ძალიან მალე ნახავს. თუ ზურა ბაქრაძეს ჰგონია, რომ მისი აღიარება რამეს უმსუბუქებს, ან ჩვენს მიმართ დანაშაულის დამტკიცებას შეძლებს, ძალიან შემცდარა! თუ ერთი ზურა ბაქრაძე გვადებს ხელს, აქეთ 4 ადამიანია, არ დაავიწყდეს. ტყუილები და ზღაპრები ძილისწინ იმას მოუყვეს, ვინც „შეკერა“ და „დააბოლა“.
ზურა ბაქრაძისნაირები გადაუგდია პროკურატურას? მისი დღეც მალე მოვა! 2004 წლიდან რამდენი წელია გასული, აქამდე სად იყო? რატომ არ იღებდა ხმას? უბრალოდ, ახლა პროკურატურამ თავისი ჭკუით „შეაბა“.
პროკურატურას როგორ არ რცხვენია, რომ ასეთ ადამიანს ასეთ ნაძირლობას აკეთებინებს? ეს ადამიანი ამბობს, 50 წუთის მერე მივედი და იარაღი მოიტანესო. არადა, ანძებით ჩვენზე ადრეა მისული! გასროლიდან 3 წუთის განმავლობაში იარაღებია ნაპოვნი, რობაქიძე ცოცხალია, სუნთქვას, კადრი უწყვეტია, დაუმონტაჟებელია. ეს პროკურატურის ექსპერტიზამაც დაადასტურა. ახლა კიდევ, ბაქრაძე სამარცხვინო ტყუილს ამბობს! აღიაროს კი არა, თუ უნდა, იმის იქით გადახტეს.
ზურაბ ბაქრაძეს ვერანაირად ვერ დავაშატნაჟებდი. მისი, არც ტელეფონის ნომერი მქონდა, ფიზიკურად მასთან შეხებაც არ მქონია, მას არც კი ვიცნობ, რა შანტაჟზე მესაუბრება? თუ მართალი კაცი იყო, რატომ გაიქცა? ვისაც დანაშაული არ ჰქონდა ჩადენილი, არსად გაქცეულა. პროკურატურა რასაც აკეთებს, ეს სამარცხვინოა! პროკურატურა გაიჭედა იმაში, რომ კადრები უტყუარია, იქ არავის არაფერი დაუდგამს, ვერავინ ნახეს, ვინც იტყოდა, რომ კადრები დაიდგა.
თუ მას ჰგონია, რომ მხოლოდ ერთ კადრში ჩანს რობაქიძის კადრებში, ძალიან შემცდარა! უამარავ კადრში ჩანს. როგორც ჟურნალისტი ველოდები, მომაწოდონ კადრები, ზურაბ ბაქრაძის როლზე კადრებს ველოდები და ვნახოთ, მერე რა აღიარებით ჩვენებას მისცემს“, - აცხადებს დონაძე.
შეგახსენებთ, ბუტა რობაქიძის მკვლელობის საქმეზე სამსახურებრივი უფლებამოსილების ბოროტად გამოყენებას შსს ყოფილ მაღალჩინოსნებს ედავებიან. აღნიშნულზე ბრალდებულია 5 პირი : გურამ დონაძე, ირაკლი ფირცხალავა, ზურაბ ბაქრაძე, დავით იაშვილი და ზურა მიქაძე.