„ხელახლა გავაკეთეთ ოთახის აღწერა, კარზე არსებული დაზიანებები შევისწავლეთ, ექსპერტიზისთვის გადასაცემად საკეტები ამოვიღეთ, აგრეთვე კედელში ვიპოვეთ ტყვიის გულის წინა ნაწილი“, - აცხადებს „ჯი-ეიჩ-ენთან“ თემირლან მაჩალიკაშვილის ოჯახის ადვოკატი, მარიამ კუბლაშვილი.
მაჩალიკაშვილის სახლში გამომძიებლები და ექსპერტები ამ დრომდე მუშაობენ.
"საქმის მასალებიდან გამომდინარე კითხვები გაჩნდა და ამ კითხვებზე პასუხის გაცემას შევეცდებით"- განაცხადა ექსპერტიზის დაწყებამდე ჟურნალისტებთან დამოუკიდებელმა ექსპერტმა, ზაზა ალთუნაშვილმა.
შეგახსენებთ, თემირლან მაჩალიკაშვილი პანკისში, სპეცოპერაციის დროს დაიჭრა და უგონო მდგომარეობაში რამდენიმე დღის განმავლობაში იმყოფებოდა, 11 იანვარს კი საავადმყოფოში გარდაიცვალა.
ცნობისთვის, სუსის ინფორმაციით, პანკისის ხეობასა და თბილისში ჩატარებული სპეცოპერაციის დროს დაკავებული ხუთი მოქალაქე დაეხმარა აჰმედ ჩატაევს საქართველოს საზღვარზე გადმოსვლაში.
დაკავებული პირები 21-22 ნოემბრის სპეცოპერაციის დროს დახოცილ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმები საქართველოში მომუშავე დიპლომატიურ კორპუსზე.
