დედაქალაქის მერი კახა კალაძე პრემიერ-მინისტრ გიორგი კვირიკაშვილთან ერთად, თბილისის საკრებულოში, ადგილობრივი თვითმმართველობის პირველ ახალგაზრდულ ფორუმს დაესწრო. ახალგაზრდულ ფორუმს საფუძველი თბილისის მუნიციპალიტეტის საკრებულოს ორგანიზებითა და სპორტისა და ახალგაზრდულ საქმეთა კომისიის ინიციატივით ჩაეყარა.
თბილისის მერმა ფორუმის მონაწილეებს სიტყვით მიმართა და დედაქალაქში დაგეგმილი პროექტების განხორციელების პროცესში ახალგაზრდების ჩართულობის მნიშვნელობაზე ისაუბრა.
„ძალიან მიხარია, რომ დღეს აქ ამდენ ახალგაზრდას ვხედავ. მინდა, წარმატებები გისურვოთ და გითხრათ, რომ თქვენი როლი ზოგადად, ქვეყნის განვითარებასა და წინსვლაში ძალიან მნიშვნელოვანია. თქვენ უნდა იყოთ მთავარი მამოძრავებელი ძალა, რომ რაც შეიძლება ბევრი ახალგაზრდა ჩავრთოთ რეგიონებში, კონკრეტულ მუნიციპალიტეტებში იმისთვის, რომ დაგეგმილი პროექტების განხორციელება შევძლოთ. მე, როგორც დედაქალაქის მერს, სამომავლოდ, ძალიან საინტერესო და მნიშვნელოვანი პროექტები მაქვს დაგეგმილი, რომლის განხორციელებასაც ვაპირებ. დღეს ერთი საინტერესო პროექტი უკვე წარმოვადგინეთ და დარწმუნებული ვარ, რომ საკუთარი იდეების მოწოდებით, მასში ძალიან ბევრი ახალგაზრდა იქნება ჩართული“, - განაცხადა კახა კალაძემ.
მისივე თქმით, დედაქალაქის მერია ყველაფერს გააკეთებს იმისთვის, რომ ელექტრონულ პორტალზე - „შენი იდეა ქალაქის მერს“ შემოსული იდეებისა და პროექტების რეალიზება მოხდეს.
„საკრებულოსთან ერთად, ასევე, ახალგაზრდების ჩართულობით საინტერესო პროექტი გვაქვს დაგეგმილი, რასაც ეტაპობრივად წარმოგიდგენთ. მჯერა, რომ ერთად შევძლებთ იმ სირთულეების გადალახვას, რომელიც დღეს ჩვენი ქვეყნისთვის აქტუალურია“, - აღნიშნა დედაქალაქის მერმა.
ადგილობრივი თვითმმართველობის ახალგაზრდული ფორუმი საქართველოში წელს პირველად იმართება. ღონისძიების დელეგატები საქართველოს 64-ვე მუნიციპალიტეტის საკრებულოს ახალგაზრდა წევრები არიან.
დელეგატებმა საკუთარი საქმიანობის შესახებ მოხსენებები წარადგინეს და თანამშრომლობის შემდგომ ნაბიჯებზე იმსჯელეს. ფორუმის ფარგლებში, ასევე, შემუშავდება საერთო წინადადებები, რასაც ერთიან რეზოლუციაზე ხელმოწერით დაადასტურებენ.
ახალგაზრდულ ფორუმს საკანონმდებლო და აღმასრულებელი ხელისუფლების, საერთაშორისო, დონორი ორგანიზაციებისა და დიპლომატიური კორპუსის წარმომადგენლები, ასევე, დედაქალაქის მთავრობის წევრები ესწრებოდნენ.
