საქართველოში ამერიკის შეერთებული შტატების საელჩო აშშ-ის მთავრობის მიერ მუშაობის შეჩერების გამო საქართველოს მოქალაქეებს მიმართავს.
საელჩოს მიერ გავრცელებულ ინფორმაციაშია ნათქვამია, რომ მოქალაქეებს, რომელთაც დანიშნული აქვთ სავიზო გასაუბრება უნდა გამოცხადდეს საელჩოში შეთანხმებულ დროს.
მათივე განმარტებით, აშშ-ის მთავრობის მუშაობის აღდგენამდე საქართველოში საელჩოს Facebook-გვერდი რეგულარულად არ განახლდება, გარდა საგანგებო და უსაფრთხოების შესახებ ინფორმაციისა.
„თუ დანიშნული გაქვთ სავიზო გასაუბრება ან ამერიკის მოქალაქეთა მომსახურების თაობაზე შეხვედრა, გთხოვთ, გამოცხადდეთ საელჩოში შეთანხმებულ დროს. აშშ-ის მთავრობის მუშაობის აღდგენამდე ეს გვერდი რეგულარულად არ განახლდება, გარდა საგანგებო და უსაფრთხოების შესახებ ინფორმაციისა“, - ნათქვამია ინფორმაციაში.
ცნობისათვის, მას შემდეგ, რაც სენატმა ვერ შეძლო ახალი ბიუჯეტის მიღება, აშშ-ის ფედერალურმა დაწესებულებებმა მუშაობა იძულებით, კვლავ შეაჩერეს.
სენატში რესპუბლიკელებისა და დემოკრატების ხელმძღვანელები ამ კვირაში შეთანხმდნენ მთელი წლის ბიუჯეტის პროექტზე, რომელიც ითვალისწინებს ხარჯების მნიშვნელოვნად გაზრდას. თუმცა, 8 თებერვალს გამართულ სხდომაზე, ფედერალური ხარჯების გაზრდის მოწინააღმდეგე რესპუბლიკელმა სენატორმა კენტუკის შტატიდან, რენდ პოლმა მოახერხა სხდომის გაჭიანურება ისე, რომ სენატორებმა შუაღამემდე ვერ შეძლეს კენჭისყრის ჩატარება. სენატი უახლოეს საათებში კვლავ შეიკრიბება და ბიუჯეტის მიღებას შეეცდება.
ბოლო 20 დღის განმავლობაში სახელმწიფო სტრუქტურები უკვე მეორედ აღმოჩნდნენ ე.წ. შათდაუნის მდგომარეობაში. ბიუჯეტზე შეუთანხმებლობის გამო, ფედერალური დაწესებულებები არ მუშაობდნენ 20 იანვრიდან 23 იანვრის პერიოდშიც და საქმიანობა მას შემდეგ განაახლეს, რაც კონგრესმა მიიღო დროებითი ბიუჯეტი. მისი მოქმედების ვადა 8 თებერვალს ამოიწურა.
