თბილისის 4 საბავშვო ბაღის აღსაზრდელები 11 სხვა ბაგა-ბაღში გადაანაწილეს. კერძოდ, მე-19 ბაგა-ბაღის აღსაზრდელები გადანაწილებულები არიან მე- 40, 23-ე და ე.წ. სმენადაქვეითებულთა ბაგა-ბაღში; 84-ე ბაგა-ბაღის აღსაზრდელები - 31-ე, 56-ე, 143-ე ბაგა-ბაღში; 125-ე ბაგა-ბაღის აღსაზრდელები - 34-ე, 69-ე, 98-ე და 94-ე ბაგა-ბაღში; ხოლო 64-ე ბაგა-ბაღის აღსაზრდელები მე-10 ბაგა-ბაღში გადაანაწილეს. 

თბილისის ბაგა-ბაღების მართვის სააგენტოს ინფორმაციით, ასევე გათვალისწინებული იქნება მშობლების სურვილიც, თუ მათ საკუთარი შვილის სხვა ბაღში გადაყვანა მოუნდებათ. 

როგორც სააგენტოში აცხადებენ, ყველა ჯგუფი შენარჩუნებულია და აღმზრდელებიც არ შეიცვლებიან. ასევე, გაგრძელდება ბაგა-ბაღების დაფინანსება და საკვებით მომარაგების საკითხი არ შეფერხდება. 
125-ე, 84-ე, 64-ე და მე-19 ბაგა-ბაღები გასულ კვირას ლევან სამხარაულის სახელობის ექსპერტიზის ეროვნული ბიუროს დასკვნების საფუძველზე დაიხურა. დასკვნების მიხედვით, შენობების ექსპლუატაცია მიზანშეწონილი არ იყო.