ზაფხულის ტურისტულ სეზონს ბათუმი ახალი მუნიციპალური ავტობუსებით შეხვდება. როგორც შპს „ბათუმის ავტოტრანსპორის“ დირექტორი ბადრი ფერტენაძე აცხადებს, ახალი ავტობუსების შემოყვანაზე ტენდერი უახლოეს დღეებში გამოცხადდება და გამარჯვებული კომპანია ვალდებული იქნება მუნიციპალიტეტს ავტობუსები 6 თვის ვადაში მოაწოდოს.
„ტენდერის გამოსაცხადებლად შესაბამისი დოკუმენტაცია ბათუმის მერიის მხრიდან უკვე მზადაა და ის გადაგზავნილია EBRD-ში, საიდანაც საბოლოო პასუხს დღე-დღეზე ველოდებით. ტენდერის გამოცხადებიდან 45 დღეში ალბად გამარჯვებულიც გამოვლინდება და საბოლოო გაირკვევა თუ ვინ იქნება მომწოდებელი“, აცხადებს ბადრი ფერტენაძე.
შპს „ბათუმის ავტოტრანსპორის“ ხელმძღვანელი განმარტავს, რომ პირველ ეტაპზე ტენდერი დიზელის საწვავზე მომუშავე ავტობუსებზე გამოცხადდება, ხოლო შემდეგი ტენდერი უკვე ელექტრო ავტობუსების შემოყვანაზე იქნება.
ტენდერის ტექნიკური პირობების მიხედვით, ავტობუსი 60 ადამიანზე (ჯდომით და დგომით) იქნება გათვლილი და არსებულ ავტობუსებთან შედარებით ახალი სატრანსპორტო საშუალება ხარჯის 50%-ით ეკონომიას გააკეთებს.
შპს „ბათუმის ავტოტრანსპორში“ აცხადებენ, რომ ახალი ავტობუსების შემოყვანის შემდეგ მგზავრობის საფასურის გაზრდა არ იგეგმება და ის კვლავინდებურად 30 თეთრი იქნება. ხოლო რაც შეეხება გადახდის წესებს, უკონტაქტო გადახდის გაუმჯობესებული სისტემის დანერგვაზე მერია მოლაპარაკებებს „საქართველოს ბანკთან“ უკვე აწარმოებს.
„ბათუმის ავტოტრანსპორის“ ხელმძღვანელი ამბობს, რომ საწყის ეტაპზე #1 ხაზზე მომუშავე ავტოტრანსპორტის ჩანაცვლება მოხდება. დაგეგმილია ასევე არსებულ სატრანსპორტო ხაზებისათვის კიდევ 2 ახალი ხაზის დამატებაც.
ცნობილი ხდება ისიც, რომ ელექტრო ავტობუსების გამოყენება ძირითადად ბათუმი ცენტრალიდან ბათუმის საერთაშორისო აეროპორტისაკენ მიმავალ საავტობუსო ხაზზე მოხდება.
ბადრი ფერტენაძე განმარტავს, რომ მგზავრთა კონფორტულობისათვის და ზოგადად ტურისტების ხელშეწყობისათვის უკვე მიმდინარეობს მუშაობა იმაზე, რომ ბათუმის საერთაშორისო აეროპორტის მიმართულებით მოძრავი ავტობუსების მუშაობის განრიგი გადაიხედოს და სეზონურობის გათვალისწინებით გახანგრძლივდეს.
როგორც ცნობილია, ბათუმის ავტობუსების განახლება ბათუმში ურბანული ტრანსპორტის მობილობას გაზრდის და შედეგად ბათუმს საავტობუსო პარკს 10 ელექტრო და 30-მდე დიზელზე მომუშავე ავტობუსი შეემატება (საწყის ეტაპზე დაანონსებული იყო 20 დიზელის საწვავზე მომუშავე ავტობუსის შემოყვანა), რისთვისაც 7 მლნ ევრო დაიხარჯება. ეს არის პირველი პროექტი კავკასიაში ელექტრო ავტობუსების შეძენის კუთხით.
აღნიშნული პროექტის განსახორციელებლად, საქართველოს მთავრობასა და EBRD-ს შორის სასესხო ხელშეკრულება 2017 წლის 13 ივლისს გაფორმდა.
შპს „ბათუმის ავტოტრანსპორტი“ ქალაქ ბათუმის მერიის დაქვემდებარებაშია და მას ქალაქის ბიუჯეტიდან მერია ყოველწლიურად აფინანსებს.
