ეკონომიკისა და მდგრადი განვითარების სამინისტროს ტურიზმის ეროვნული ადმინისტრაცია 2017 წლის განმავლობაში აქტიურად საუბრობდა ქვეყანაში საქმიანი ტურიზმის პოტენციალზე. ადმინისტრაციამ უცხოელი სპეციალისტების დახმარებითა და კონსულტაციის საქმიანი ტურიზმის სტრატეგია შექმნა.
პროექტი საერთაშორისო ორგანიზაცია GIZ-ის დაფინანსებით ტარდება. საერთაშორისო კომპანია ENITED-ის წარმომადგენლებმა ტურიზმის ეროვნული ადმინისტრაციის საკონვენციო და საგამოფენო ბიუროს წარმომადგენლებთან და წევრ კომპანიებთან რამდენიმე სამუშაო შეხვედრაც გამართეს.
რას გეგმავს და რა პოტენციალი გააჩნია საქართველოს ამ მიმართულებით გვესაუბრება ტურიზმის ეროვნული ადმინისტრაციის საკონვენციო და საგამოფენო ბიუროს უფროსი თორნიკე ზირაქაშვილი:
– დაახლოებით რა წილი უდევს MICE ტურიზმს მთლიან ტურიზმში და რა პოტენციალი აქვს ამ მხრივ საქართველოს რეგიონის სხვა ქვეყნებთან შედარებით?
– საქმიანი ტურიზმი სპეციფიკური მიმართულებაა და მისი განვითარებისათვის განსხვავებული მიდგომებია საჭირო. ამ თვალსაზრისით, სექტორის ფარგლებში მეტი ყურადღება ენიჭება ღონისძიებების სახეობებს და მათ მნიშვნელობას. მაგალითად, ყველაზე რთული კატეგორიის შეხვედრებად ასოციაციების კონფერენციები და ასამბლეები განიხილება, რადგან მათი ქვეყანაში მოზიდვის პროცედურა შედარებით მკაცრია და მათი დაგეგმვა (გასამართი ადგილის განსაზღვრა), როგორც წესი ორი ან მეტი წლით ადრე ხდება. საქმიანი ტურიზმის მიმართულებით საქართველოს საკმაოდ კარგი პოტენციალი გააჩნია. ქვეყნის ძლიერ მხარეებს შორის არის ლიბერალური სავიზო პოლიტიკა, უსაფრთხო გარემო, სტუმართმოყვარე ხალხი და ხარისხთან და საერთაშორისო ღირებულებებთან შედარებით დაბალი ფასები.
– რა არის გასაკეთებელი იმისათვის, რომ ტურიზმის ეს მიმართულება კიდევ უფრო განვითარდეს? ხომ არ იგეგმება ამ მიმართულების ტურიზმის განვითარებისთვის თუნდაც რაიმე საგადასახადო შეღავათები?
– ქვეყნის საქმიანი ტურიზმის პოტენციალის გათვალისწინებით, 2017 წლის დეკემბერში, დასრულდა მუშაობა საქართველოს პირველი საქმიანი ტურიზმის სტრატეგიისა და სამოქმედო გეგმის შემუშავებაზე, რომელიც GIZ-ის მიერ იქნა დაფინანსებული და ავსტრიული კომპანია ENITED-მა მოამზადა. სტრატეგიის ფარგლებში განხილულია 30-ზე მეტი რეკომენდაცია, მათ შორის, საშეღავათო პირობები, რომელიც შეიძლება ქვეყანამ უზრუნველყოს ამ სეგმენტის განვითარებისათვის. აღნიშნული სტრატეგია მომდევნო 3 წელზეა გათვლილი.
– რეგიონის ქვეყნებიდან MICE ტურიზმის რეიტინგში საქართველო რა პოზიციაზეა, და წლის განმავლობაში ამ მიზნით რა რაოდენობის ტურისტი სტუმრობს ქვეყანას და არის თუ არა სტატისტიკა მზარდი?
– საქმიანი ტურიზმის სეგმენტში ყველაზე მეტი მნიშვნელობა ICCA-ს (International Congress and Convention Association) რეიტინგს ენიჭება, რომელიც ყოველწლიურად დგინდება. აღსანიშნავია რომ, უკანასკნელი ორი წლის განმავლობაში, კავკასიის რეგიონში საქართველომ პირველი ადგილი დაიკავა და დარწმუნებულები ვართ წელსაც გააუმჯობესებს ქვეყანა ხსენებულ რეიტინგს.
– ძირითადად რომელი ქვეყნებიდანაა მოთხოვნა საქართველოზე MICE ტურიზმის მიმართულებით?
– საქმიანი ტურიზმის სპეციფიკიდან გამომდინარე, მოთხოვნები ზოგადად გეოგრაფიულად ახლოს მდებარე ქვეყნებიდან ჭარბობს. მსგავსი ტენდენციაა საქართველოსთან მიმართებაშიც, თუმცა აღსანიშნავია, რომ MICE (საქმიანი ტურიზმის) სეგმენტის ერთ-ერთი უმთავრესი მახასიათებელი არის სხვადასხვა ქვეყნებიდან და შორი ბაზრებიდან ჯგუფების ერთ-ქვეყანაში შესახვედრად შეკრება. მაგალითისათვის, საქართველომ მოიპოვა უფლება 2019 წელს უმასპინძლოს მსოფლიო გიდების ასოციაციების ფედერაციის კონგრესს, რომელსაც 70-ზე მეტი ქვეყნის წარმომადგენელი დაესწრება.
