"ადვოკატების კვალიფიკაციაზე პრეტენზია არ მაქვს და არ მინდა, რომ მათ კარიერაში წაგებული საქმე იყოს",- განაცხადა სასამართლო პროცესზე ბათუმის მოვლენებზე ბრალდებულმა ირაკლი ჩხვირკიამ.
მან ადვოკატების აცილების თაობაზე სასამართლოს დღეს მიმართა. როგორც ჩხვირკია განმარტავს, პოლიტიზირებულ სასამართლოში გადაწყვეტილება უკვე მიღებულია და ადვოკატების ყოფნის აუცილებლობას ვერ ხედავს.
ირაკლი ჩხვირკიას მოთხოვნა მოსამართლემ დააკამაყოფილა.
ამ წუთებში ბათუმის საქალაქო სასამართლოში ბათუმის მოვლენებზე ირაკლი ჩხვირკიას და მერაბ ღოღობერიძის სასამართლოს პროცესი მიმდინარეობს. დღეს ბრალდებული ირაკლი ჩხვირკიას საქმეზე "ერთიანი ნაციონალური მოძრაობის" წევრები დაიკითხებიან. მომდევნო სასამართლო პროცესებზე მხარეები დასკვნით სიტყვას წარმოთქვამენ.
პროკურატურა მერაბ ღოღობერიძისა და ირაკლი ჩხვირკიას ბათუმში, 11-12 მარტს განვითარებული მოვლენების ორგანიზებასა და ხელმძღვანელობას ედავება.
