„რამდენ წუთში განვახორციელებ მიხეილ სააკაშვილთან დაკავშირებას, ზუსტად ვერ გეტყვით, ჯერ საქმის მასალები უნდა გამოვითხოვო“, - განუცხადა „ჯი-ეიჩ-ენს“ მიხეილ სააკაშვილის ახალმა ადვოკატმა, სოფიო გოგლიჩიძემ.
რაც შეეხება იმ ფაქტს, შეხვდება თუ არა ის სააკაშვილის ყოფილ ადვოკატებს, მოგვიანებით გახდება ცნობილი.
„ერთი საათის წინ დასრულდა პროცესი, ჩამოვყალიბდები, ყველაფერს შევაჯამებ და შემდეგ დავგეგმავ რას და როდის გავაკეთებ. ახლა განცხადებას ვამზადებ, რომ სასამართლოდან გამოვითხოვო საქმის მასალები და სხდომის ოქმები“, - აცხადებს ადვოკატი.
ის დასძენს, რომ არც საქმეს და არც ყოფილ პრეზიდენტს არ იცნობს.
„როგორც ჩეულებრივი მოქალაქე, ტელევიზიის საშუალებით ვადევნებდი თვალ-ყურს, მაგრამ ვინაიდან მისი დაცვა, ამ საქმეში მონაწილეობის მიღება დამევალა, უფრო სრულყოფილად შევისწავლი საქმეს და შემდეგ მოგახსენებთ დაწვრილებით დეტალებს.
ნამდვილად ვერ ვიფიქრებდი, რომ მისი დაცვა მე მომიწევდა, რა თქმა უნდ, ჩემთვის ეს მოულოდნელი იყო, ალბათ, ისევე როგორც ყველა ადვოკატისთვის იქნებოდა მოულოდნელი“, - აცხადებს სააკაშვილის ადვოკატი.
მისი თქმით, სასამართლოს მიერ მიცემულ ვადაში შესაძლოა მან საქმის მასალების გაცნობა ვერ მოასწროს და სხდომის გადადება მოითხოვოს.
დღეს თბილისის საქალაქო სასამართლოში საქართველოს ყოფილ პრეზიდენტს, მიხეილ სააკაშვილს საზოგადოებრივი ადვოკატი დაენიშნა. სოფიო გოგლიჩიძე პროცესზე დღეს პირველად გამოცხადდა.
სააკაშვილმა ქართულ მართლმსაჯულებას უნდობლობა გამოუცხადა და ადვოკატები აიცილა.
შეგახსენებთ, რომ სანდრო გირგვლიანის მკვლელობის საქმის ერთ-ერთ ეპიზოდზე ყოფილ პრეზიდენტს სახელმწიფო ბრალება უფლებამოსილების ბოროტად გამოყენებას ედავება.
შემდეგი სასამართლოს ხდომა 22 დეკემბერს ჩაინიშნა.
