თბილისის საქალაქო სასამართლოში დღეს, ნომერ მერვე სასჯელაღსრულების დაწესებულების სამართლებრივი რეჟიმის უფროსის, ოლეგ ფაცაციასა და ამავე პენიტენციური დაწესებულების თანამშრომლის, ზაზა ხარაიშვილის სასამართლო პროცესი მიმდინარეობდა.
პროცესზე ერთ-ერთმა ყოფილმა პატიმარმა განაცხადა, რომ „კარანტინის“ დაშლის დროს, პატიმრების ცემა ჩვეულებრივი ამბავი იყო.
„კვირაში სამჯერ მაინც შემოდიოდნენ და უმიზეზოდ გვცემდნენ. ხან რადიოს მოსმენის გამო, ხან ხმაურის გამო, წამლის მოთხოვნის გამო, ხანაც უმიზეზოდ გვირტყამდნენ. შემდეგ კი გვაიძულებდნენ ოქმში ჩაგვეწერა, რომ საიდანღაც ჩამოვვარდით, ან რამეს მივარტყით და ამიტომაც გვქონდა დაზიანებები“, - განაცხადა მოწმე ოთარ ჟღენტმა.
აღნიშნული ჩვენების გამო ბრალდებულმა ხარაიშვილმა მოწმეს შეურაცხყოფა მიაყენა, რის გამოც მას მოსამართლემ დარბაზი დაატოვებინა.
ადვოკატი, მალხაზ ველიჯანაშვილი „ჯი-ეიჩ-ენთან“ არ გამორიცხავს, რომ მოწმე შესაძლოა იტყუებოდეს, რადგან მისი ჩვენება მტკიცებულებებით არ დასტურდება.
„მოწმის ჩვენება სხვა მტკიცებულებებით უნდა დადასტურდეს, რაც წარმოდგენილი არ არის და ასეთი გარემოება არ დასტურდება“, - აცხადებს ველიჯანაშვილი.
შეგახსენებთ, რომ მთავარმა საგამოძიებო უწყებამ ექვსი პირი, 2017 წლის 10 მაისს დააკავა. რაც შეეხება ოლეგ ფაცაციას, ის სხვა საქმეზე იხდიდა მსჯავრს.
ბრალდებულებს პროკურატურა 144 მუხლის პირველ დამესამე ნაწილს ედავება, რაც არაადამიანურ და დამამცირებელ მოპყრობას გულისხმობს სამსახურეობრივი მდგომატეობის გამოყენებით თაბისუფლება შეზღუდული პირის მიმართ. ბრალის დამტკიცების შემთხვევაში, მათ 4-დან 6 წლამდე თავისუფლების აღკვეთა ემუქრებათ.
