მეგის ქარდავა ვინ არის, უცნაური სახელია ხომ? - განაცხადა საქართველოს ყოფილმა პრეზიდენტმა, მიხეილ სააკაშვილმა ,,საზოგადოებრივთან” საუბარში. მისი თქმით, საქართველოს თავდაცვის სამინისტროს სამხედრო პოლიციის დეპარტამენტის ყოფილ უფროსს მეგის ქარდავას არასდროს შეხვედრია.
„მეგის ქარდავა ვინ არის, ვიცი ზუსტად თქვენსავით და ტელევიზიით. ცხოვრებაში ამ ადამიანს არ შევხვედრივარ და უბრალოდ ეტყობა, სახელი და გვარი აინტერესებს ვიღაცას და ატრიალებს. უცნაური სახელია ხომ? მე ნამდვილად არ ვიცნობ ამ პიროვნებას და არც ის ვიცი, უკრაინასთან რა კავშირშია. რატომ აღმოჩნდა უკრაინაში, ეგეც არ ვიცი, მაგრამ ერთი რამე ვიცი, რომ ნებისმიერი ასეთი თემის გამოყენება პროვოკაციისთვის ამ მოძრაობის წინააღმდეგ, რაც სცადა უკრაინის ხელისუფლებამ და საქართველოს ხელისუფლებამ, არ გამოვა იმიტომ, რომ მეგისი თუ სხვები და ვიღაცები ამას მნიშვნელობა არ აქვს, აი ეს არის ჩვენი ხალხი. რაც შეეხება ქართველებს, რა თქმა უნდა, იმედია ყველაფერი სამართლიანად გადაწყდება“,- განაცხადა სააკაშვილმა.
ცნობისათვის, მეგის ქარდავა უკრაინაში დააკავეს. მას 9 წლით თავისუფლების აღკვეთა უკვე დაუსწრებლად საქართველოში აქვს მისჯილი. მიმდინარეობს საექსტრადაციო პროცედურები.
კიევში, უკრაინის პრეზიდენტის პეტრო პოროშენკოს იმპიჩმენტის მოთხოვნით, უკრაინის ყოფილი გუბერნატორი მიხეილ სააკაშვილი საპროტესტო მარშს მართავს.
