ქუთაისში ყოველი წლის 2 მაისს გვირილობის დღესასწაულს აღნიშნავენ. ამ დღეს ქალაქის ქუჩები გვირილებითაა მოფენილი, სამკერდე ნიშნებადაც თეთრ გვირილებს იბნევენ. ამ გვირილებს ყოფილი პატიმარი, 56 წლის ჯულიეტა (ნანა) ფხაკაძე მუყაოსა და ქაღალდებისგან ამზადებს. ხელსაქმით საპყრობილეში ყოფნის დროს დაინტერესდა. ამბობს, რომ რეალობას ფხიზლად უყურებს და იცოდა, თუ წინასწარ არ იფიქრებდა სამომავლო საქმიანობაზე, გათავისუფლების შემდეგ გარემოსთან ადაპტაცია გაუჭირდებოდა.

საპყრობილეში ისწავლა მძივებით სამკაულების კეთებაც. პროფესიით ბუღალტერია და ციხეში მოხვედრამდე ბუღალტრად მუშაობდა.

ჯულიეტამ შეისწავლა ქვილინგის ტექნოლოგია – ქაღალდებით დეკორატიული ნივთების დამზადება. ფერად ქაღალდებს ყიდულობს, მოსაწვევ ბარათებს, ღონისძიებებისთვის სამკერდე ნიშნებს აკეთებს, ასევე დროშებს, ჩოხებს, ეროვნულ სიმბოლოებს, რომლებსაც ტურისტები ყიდულობენ. მოსწონს თავისი საქმე და მუშაობის პროცესი სიამოვნებს. სხვადასხვა ფორმის დამზადებას ქაღალდის განსხვავებულად დაჭრა სჭირდება. ქაღალდის საჭრელი აპარატი ჯულიეტას „დემოკრატიის ინსტიტუტის“ პროგრამის ფარგლებში გადასცეს. პარალელურად მაღაზიაში ბუღალტრადაც მუშაობს, თან მძივებს და სამაჯურებს აკეთებს ნახევრად ძვირფასი ქვებისგან. ჯულიეტა ფხაკაძის სამკაულებს სამოსის მაღაზიებში კაბებთან ერთად ყიდიან.