ეკონომიკისა და მდგრადი განვითარების მინისტრის, გიორგი გახარიას განცხადებით, პირველადი დათვალიერების შედეგებმა აჩვენა, რომ თბილისიდან ყარსში მატარებლით ჩასვლა შესაძლებელია.
როგორც მინისტრმა აღნიშნა, ინფრასტრუქტურის კუთხით კიდევ ბევრი რამაა გასაკეთებელი.
"ბოლო მონაკვეთზე დასასრულებელია ელექტროფიცირების ნაწილი, თუმცა რკინიგზის საშუალებით დღეს თბილისიდან ყარსში ჩახვალ, რაც უკვე მისასალმებელია. ეს არის ტესტირების ეტაპი და კიდევ რა არის გასაკეთებელი იმისთვის, რომ დროულად ეს სარკინიგზო ხაზი, ამის დასადგენად დაახლოებით, 10 დღე დაგვჭირდება.
აღნიშნული სარკინიგზო ხაზი ჩინეთს ევროპასთან აკავშირებს. პრინციპულად ხარისხობრივად იცვლება ლოგისტიკა რეგიონში, ასევე კოორდინირების სისტემა რეგიონში და ის დიდი ვაჭრობა, რომელიცაა ყაზახეთსა და თურქეთს შორის, ჩინეთსა და თურქეთს შორის, ამ სარკინიგზო ხაზით მისი ნაწილობრივი მომსახურება უკვე შესაძლებელია. დღეს იყო საუბარი იმაზე, რომ უკვე დროა დავიწყოთ ფიქრი მეორე ხაზზე, რადგან გადაზიდვების პერსპექტიული მოცულობები საკმაოდ დიდია", - განაცხადა გახარიამ.
მისივე თქმით, ხვალიდან რამდენიმე საკითხზე მოადგილეების დონეზე დაიწყება მუშაობა.
"ერთ-ერთი იქნება დასასრულებელი სამუშაოების ნუსხის იდენტიფიცირება დროსა და მოცულობაში, რის შემდეგაც განისაზღვრება, თუ როდის იქნება შესაძლებელი აღნიშნულ გზაზე პირველი სატესტო სატვირთო მატარებლის გავლა. ეს შეიძლება იყოს ერთ თვის, შეიძლება იყოს სამი თვის შემდეგ.
ახალი სარკინიგზო ხაზი ორიენტირებული იქნება ყველა სახის ტვირთზე და უკვე არის რამდენიმე შემოთავაზება, მათ შორის, საკონტეინერო ტვირთებზე ყაზახეთის მხრიდან თურქეთის მიმართულებით.
რაც შეეხება პორტებს, ეს სარკინიგზო ხაზი ქართული პორტების კონკურენტი ვერ გახდება. ჩვენს თურქ და აზერბაიჯანელ კოლეგებს განვუცხადეთ, რომ საქართველოს მთავრობა და ეკონომიკის სამინისტრო ყოველთვის დაიცავს ქართული პორტების ინტერესებს", - განაცხადა მინისტრმა, რომელიც დღეს თურქეთის ტრანსპორტის, საზღვაო საქმეთა და კომუნიკაციების მინისტრ აჰმედ არსლანთან და აზერბაიჯანის რკინიგზის ხელმძღვანელ ჯავიდ ყურბანოვთან ერთად ბაქო-თბილისი-ყარსის სარკინიგზო ხაზის ინსპექტირების მიზნით, თბილისიდან კარწახამდე მატარებლით იმგზავრა.
ცნობისთვის, ახალი სარკინიგზო ხაზის პროექტის ფარგლებში, გათვალისწინებულია მარაბდა-კარწახის 180 კმ სიგრძის სარკინიგზო უბნის რეაბილიტაცია, რეკონსტრუქცია და მშენებლობა. პროექტი შედგება: მარაბდა-ახალქალაქის სარეკონსტრუქციო სარეაბილიტაციო უბნისგან - საექსპლუატაციო სიგრძით 153 კმ და ახალქალაქი-კარწახი (თურქეთის საზღვარი) - 27კმ სიგრძის ახალი სამშენებლო უბნისგან.
მარაბდა-ახალქალაქი-კარწახის სარკინიგზო უბნის რეაბილიტაცია, რეკონსტრუქცია და მშენებლობა წელიწადში 5 მლნ ტონა ტვირთბრუნვაზე და 1 მლნ. მგზავრთნაკადზე გათვლილი პროექტის შესაბამისად (წელიწადში 15 მლნ ტონა ტვირთბრუნვის პერსპექტივით) მიმდინარეობს. პროექტის მიხედვით, თანამედროვე ტექნოლოგიების გამოყენებით, გათვალისწინებულია არსებულ სარკინიგზო ხაზზე ყველა დარგის ობიექტების სრული რეაბილიტაცია-რეკონსტრუქცია. ბაქო-თბილისი-ყარსის ახალი სარკინიგზო ხაზის ამოქმედების შემდეგ შეიქმნება ევროპა-აზიის ახალი დამაკავშირებელი სარკინიგზო მარშრუტი, რომელიც ხელს შეუწყობს საქართველოს, როგორც სატრანზიტო ქვეყნის პოტენციალის ამაღლებას. ეს არის პროექტი, რომელმაც სამი ქვეყნის ერთობლივი ძალისხმევით რეგიონი უნდა აქციოს სატრანსპორტო და სავაჭრო ჰაბად, რომელიც მნიშვნელოვან როლს შეასრულებს ახალი აბრეშუმის გზის პროექტში.
აღსანიშნავია, რომ მსოფლიოს 100 გლობალურ პროექტს შორის, ბაქო-თბილისი-ყარსის რკინიგზა მსოფლიოს ერთ-ერთ სტრატეგიულ პროექტად არის აღიარებული.
