18-21 სექტემბერს, ჩინეთში, ქალაქ სიამენში, უმსხვილესი საერთაშორისო საინვესტიციო და სავაჭრო გამოფენა (China International Fair for Investment & Trade) გაიმართება, რომლის ინიციატორიც ჩინეთის სახალხო რესპუბლიკის ხელისუფლებაა და დაფინანსებულია ჩინეთის ვაჭრობის სამინისტროს, ასევე, სხვადასხვა უმსხვილესი საერთაშორისო ინსტიტუტების მიერ (UNCTAD, UNIDO, WTO, OECD, IFC, WAIPA). http://www.chinafair.org.cn/english/index/
აღსანიშნავია, რომ საქართველოს CIFIT - ის ღონისძიებაზე მიენიჭა მოწვეული საპატიო ქვეყნის სტატუსი. გამოფენაზე საქართველოსთვის დათმობილიასაგამოფენო სივრცე, სადაც გაიმართება მაღალი დონის სამთავრობო შეხვედრები, გამოფენა, ე.წ. B2B სესიები და საქართველო-ჩინეთის ბიზნეს ფორუმი.
დელეგაციას საქართველოს მხრიდან უხელმძღვანელებს ეკონომიკისა და მდგრადი განვითარების მინისტრი - გიორგი გახარია.
აღნიშნულთან დაკავშირებით, საქართველოს ეკონომიკისა და მდგრადი განვითარების სამინისტროსთან ერთად, სოფლის მეურნეობის სამინისტროს, რეგიონალური განვითარებისა და ინფრასტრუქტურის სამინისტროს, ენერგეტიკის სამინისტროს, საგარეო საქმეთა სამინისტროს და კულტურისა და ძეგლთა დაცვის სამინისტროს ორგანიზებით დაგეგმილია საქართველოს პოტენციალის წარმოჩენა სხვადასხვა ჭრილში, რაც უმთავრესად ბიზნეს კლიმატის, საინვესტიციო და სავაჭრო შესაძლებლობების აუდიტორიისთვის გაცნობას გულისხმობს.
