აჭარაში ოფიციალური ვიზიტით ავღანეთის ისლამური რესპუბლიკის ფინანსთა მინისტრი იქლილ ჰაკიმი იმყოფება. იქლილ ჰაკიმთან ოფიციალური შეხვედრა აჭარის ფინანსთა და ეკონომიკის მინისტრმა რამაზ ბოლქვაძემ გამართა.
ორი ქვეყნის მინისტრებმა საქართველოს და კონკრეტულად აჭარის და ავღანეთის ისლამურ რესპუბლიკას შორის სავაჭრო-ეკონომიკური ურთიერთობების განვითარებაზე ისაუბრეს.
ოფიციალური ვიზიტის ფარგლებში დელეგაცია ბათუმის პორტს ეწვია. პორტის მუშაობის შესახებ დეტალური ინფორმაცია სტუმრებს პორტის წარმომადგენლემა გააცნო. ავღანეთის ისლამური რესპუბლიკის ფინანსთა მინისტრი ბათუმის პორტის ტვირთბრუნვისა და სხვა პორტებთან თანამშრომლობის საკითხებით დაინტერესდა. საუბარი ბათუმის პორტთან სამომავლო თანამშრომლობას შეეხო.
2017 წლის იანვარ-მაისის მონაცემებით, საქართველოსა და ავღანეთის ისლამურ რესპუბლიკას შორის სავაჭრო ბრუნვამ 0,11 მლნ. აშშ დოლარი შეადგინა, რაც გასული წლის ანალოგიური პერიოდის მაჩვენებელს 68%-ით აღემატება
იქლილ აჰმად ჰაკიმი პირველი ავღანელი მინისტრია, რომელიც საქართველოში ოფიციალური ვიზიტით იმყოფება. ავღანეთის ფინანსთა მინისტრმა ოფიციალური შეხვედრები თბილისში უკვე გამართა. დელეგაციის წარმომადგენლები ქართული კომპანიების წარმომადგენლებსაც შეხვდებიან. სტუმრები მოგვიანებით ფოთის პორტს ეწვევიან. დელეგაცია აჭარას დღეს დატოვებს.
