„ცხადია, დესტრუქციული ქმედებები არცერთ შემთხვევაში არ არის მისაღები“,-განაცხადა საქართველოს პრეზიდენტის ადმინისტრაციის უფროსმა, გიორგი აბაშიშვილმა. მან დღეს საკონსტიტუციო პროექტის განხილვაზე მომხდარი შეაფასა და დასძინა, რომ შეხვედრის ჩაშლა დესტრუქციული ნაბიჯი იყო.
„დღევანდელთან დაკაშირებით დეტალური ინფორმაცია არ მაქვს, თუმცა მინდა აღვნიშნო, რომ როგორც კამპანია „კონსტიტუცია ყველასია“-ს ფარგლებში, ისე საერთო სახალხო განხილვის დროს, საქართველოს რეგიონებში, ასევე თბილისში ყოველთვის იყო ძალიან აქტიური აუდიტორია, ძალიან კრიტიკული კითხვებით. ბუნებრივია, ყველა მოსაზრება ვერ იქნება ყველასთან თანხვედრაში, თუმცა ყველა კითხვაზე უნდა არსებობდეს გარკვეული ტიპის პასუხი. ცხადია, დესტრუქციული ქმედებები არცერთ შემთხვევაში არ არის მისაღები, არცერთი მხარის მხრიდან“,-განაცხადა გიორგი აბაშიშვილმა.
შეგახსენებთ, რომ დღეს ფილარმონიაში მიმდინარე საკონსტიტუციო პროექტის განხილვა დასაწყისშივე ჩაიშალა. შეკრებილმა არასამთავრობო ორგანიზაციების წევრებმა და პროფკავშირებმა ხმაურისგან პარლამენტის თავმჯდომარეს განხილვის დაწყების შესაძლებლობა არ მისცეს.
