თბილისის მუნიციპალიტეტის საკრებულოს თავმჯდომარემ გიორგი ალიბეგაშვილმა და საკრებულოს წევრებმა ქალთა საინფორმაციო ცენტრის ორგანიზებით გამართულ შეხვედრაში მიიღეს მონაწილეობა.
შეხვედრის მიზანი თბილისის მუნიციპალიტეტის გენდერული თანასწორობის ინსტიტუციური მექანიზმის - საკრებულოსთან არსებული გენდერული თანასწორობის საბჭოს და თბილისის მუნიციპალიტეტის გენდერული თანასწორობის სტრატეგიის პრეზენტაცია იყო.
შეხვედრის მონაწილეებს სიტყვით გიორგი ალიბეგაშვილმა მიმართა, ქალთა საინფორმაციო ცენტრს აქტიურობისთვის მადლობა გადაუხადა და თბილისის მუნიციპალიტეტის სახელით სამომავლო თანამშრომლობის მზაობა გამოხატა.
შეხვედრაზე, რომელიც დისკუსიის ფორმატში გაგრძელდა, თბილისის მუნიციპალიტეტის საკრებულოსთან არსებული გენდერული საბჭოს წევრებმა, ფრაქციის „ქართული ოცნება - დემოკრატიული საქართველოსთვის“ თავმჯდომარემ რიმა ბერაძემ, ადგილობრივი თვითმმართველობათა ეროვნული ასოციაციის აღმასრულებელი საბჭოს წევრმა თამარ ტალიაშვილმა და საკრებულოს დამოუკიდებელმა წევრმა სევდია უგრეხელიძემ დოკუმენტთან დაკავშირებით საკუთარი მოსაზრებები და რეკომენდაციები გამოთქვეს.
როგორც შეხვედრის დასასრულს ქალთა საინფორმაციო ცენტრის დირექტორმა ელენე რუსეცკაციამ აღნიშნა, დისკუსიის ფორმატში გამოთქმული რეკომენდაციები თბილისის მუნიციპალიტეტის გენდერული თანასწორობის სამოქმედო გეგმაში აისახება, რის შემდეგაც დოკუმენტის სამუშაო ვერსია შეხვედრის მონაწილეებს გასაცნობად გადაეცემათ.
მისივე თქმით, სამოქმედო გეგმის საბოლოო ვარიანტის შემუშავების მიზნით მსგავსი შეხვედრები კვლავ გაიმართება.
შეხვედრაში თბილისის მუნიციპალიტეტის საკრებულოს წევრებთან ერთად მონაწილეობა თბილისის მერიის, გამგეობების და გენდერულ თემებზე მომუშავე არასამთავრობო ორგანიზაციების წარმომადგენლებმა მიიღეს.
თბილისის მუნიციპალიტეტის საკრებულომ გენდერული თანასწორობის საბჭო 2016 წლის ნოემბერში ჩამოაყალიბა, ხოლო მუნიციპალიტეტის გენდერული თანასწორობის სტრატეგია კი 2017 წლის 3 თებერვალს დაამტკიცა.
