რასაც პარლამენტი ე.წ. გასაღებთან დაკავშირებით განიხილავს, არის რუსული მოდელი, რომელიც ადამიანის უფლებათა სასამართლომ ზახაროვის საქმეში მიიჩნია კონვენციის მერვე მუხლის საწინააღმდეგოდ“, - ამის შესახებ საია-ს წარმომადგენელმა გიორგი გოცირიძემ ე.წ. მოსმენების გასაღებთან დაკავშირებულ კანონპროექტზე კომენტირებისას განაცხადა.
მისი განმარტებით, ევროპული მიდგომის მიხედვით, ე.წ. გასაღები არის კერძო ოპერატორების ხელში, რუსული მიდგომით კი - უსაფრთხოების სამსახურს აქვს პირდაპირი წვდომა საკომუნიკაციო საშუალებებთან
აღნიშნულ კანონპროექტზე პრეზიდენტის მოსალოდნელ ვეტოსტან დაკავშირებით, გოცირიძე აცხადებს, რომ კანონპროექტის შესაჩერებლად, ყველანაირი ღონისძიება უნდა იქნეს გამოყენებული.
„ვეტოს საკითხზე დღეს არ გვისაუბრია და ბუნებრივია, არც იმის პირობა არ მიგვიღია, რომ პრეზიდენტი აუცილებლად ვეტოს დაადებს ამ კანონპროექტს, თუმცა მიგვაჩნია, რომ ყველანაირი ღონისძიება, მათ შორის პრეზიდენტის ვეტო და სხვა საერთაშორისო თუ შიდა სამართლებრივი საშუალებები უნდა იქნას გამოყენებული, რომ საკონსტიტუციო სასამართლოს გადაწყვეტილება შესრულდეს და ეს კანონპროექტი ამ ფორმით არ იქნას მიღებული“, - განაცხადა გოცირიძემ.
ე.წ. ფარულ მოსმენებთან დაკავშირებული საკანომდებლო პაკეტის განხილვა პარლამენტში ხვალიდან იწყება, საქართველოს პრეზიდენტის ადმინისტრაციამ კი ფარულ საგამოძიებო მოქმედებებთან დაკავშირებული საკანონმდებლო პაკეტის შესწავლა და შესაბამის უწყებებთან კონსულტაციები დაიწყო.
