აჭარის ფინანსთა და ეკონომიკის სამინისტრო ბათუმი-ქედის მონაკვეთის ბუნებრივი აირის მილსადენის მშენებლობის სამშენებლო დოკუმენტის პროექტის შედგენის მიზნით ელექტრონულ ტენდერს აცხადებს.
სატენდერო პირობების მიხედვით ქედის მუნიციპალიტეტის ბუნებრივი აირის მილსადენის დაპროექტებისას, საპროექტო დოკუმენტაცია ქვეყანაში მოქმედი საპროექტო-სამშენებლო ნორმებისა და ტექნიკური რეგლამენტების მოთხოვნების შესაბამისად უნდა დამუშავდეს.
წინასაპროექტო კვლევა დასახლებათა გაზიფიცირების არეალისა და საორიენტაციო აბონენტების რაოდენობის განსაზღვრას უნდა მოიცავდეს. გამოკვლეული უნდა იყოს ბუნებრივი აირის მომხმარებელი საწარმოების რაოდენობა, პერსპექტიული განვითარების ჩათვლით. გაზსადენის სირთულიდან გამომდინარე უნდა ჩატარდეს დეტალური ჰიდრავლიკური გაანგარიშება და მომზადდეს სიტუაციური ნახაზი ე.წ გენერალური გეგმა. ტენდერის პირობებში მითითებულია, რომ გაზსადენი მშენებლობის ექსპლუატაციისა და უსაფრთხოების ოპტიმალური კრიტერიუმების დაცვით უნდა დაპროექტდეს და ის საქართველოში მოქმედ სტანდარტებს უნდა პასუხობდეს.
გაზსადენის დაპროექტებისას გამოყენებული უნდა იყოს გეოლოგიური და სხვა საკვლევ-საძიებო მასალები. გაზსადენის კონტურის შერჩევისას გათვალისწინებული უნდა იყოს სახელმწიფო და კერძო ინტერესები, ასევე კონტურში მოქცეული ტერიტორიების გეოლოგიური მდგრადობის საკითხები. შემსყიდველმა ხელშეკრულების გაფორმებიდან 4 თვეში პროექტის მომზადება უნდა უზრუნველყოს. პროექტირების ტენდერის დასრულების შემდეგ, მშენებლობის ტენდერი გამოცხადდება. მილსადენის მშენებლობა წელს დაიწყება და ის 2018 წლის დასაწყისში დასრულდება.
დამატებითი ინფორმაციისთვის იხილეთ ბმული:
https://tenders.procurement.gov.ge/public/?lang=ge
