კვლევითი ცენტრი WEG გაზის გაზრდილი გადასახადების გამო შეშფოთებულ მოსახლეობას დამათბუნებელი მასალების გამოყენებას ურჩევს. WEG- ს მიერ გავრცელებულ განცხადებას უცვლელეად გთავაზობთ:
,,ბოლო პერიოდში იმატა მომხმარებელთა შეშფოთებამ გაზის და ელექტროენერგიის გაზრდილი გადასახადის გამო. ზოგი ეჭვს გამოთქვამს გაზის მომწოდებლების შესაძლო მაქინაციებისა და გაზის ხარისხის მიმართ.
კვლევითი ცენტრი WEG ამასთან დაკავშირებით მოსახლეობას მიმართავს:
- შეამოწმეთ მრიცხველის ჩვენება და მისი შესაბამისობა გამოწერილ ქვითართან - თუ ჩვენებები არ ემთხვევა, მიმართეთ მომწოდებელ კომპანიას - შესაძლოა თქვენ მიიღეთ შეფასებითი ქვითარი, რომლის თანხაც შემდეგ თვეში გასწორდება.
- გაზის ხარისხთან და მასში ჰაერის ან სხვა მინარევების შერევასთან დაკავშირებული ეჭვები უსაფუძვლოა, ვინაიდან გაზგამანაწილებელ კომპანიებს ასეთი ტექნიკური შესაძლებლობა არ აქვთ. საქართველოს გაზი აზერბაიჯანიდან და რუსეთიდან მოეწოდება, რასაც საქართველოს გაზის ტრანსპორტირების კომპანია (გტკ) ანაწილებს სხვადასვხა რეგიონში. მართალია რუსული გაზის თბოუნარიანობა 5%-ით ნაკლებია აზერბაიჯანულზე, მაგრამ ამას შესამჩნევი გავლენა კონკრეტულ მომხმარებელზე ვერ ექნება. სგტკ ზომავს და აქვეყნებს (http://bit.ly/2iSeFfu) სხვადასხვა ქალაქსა და რეგიონში მიწოდებული გაზის თბოუნარიანობის მაჩვენებლებს რაშიც მნიშვნელოვანი ცვალებადობა არ შეინიშნება.
რჩება ყველაზე ბანალური ახსნა, რომ მომატებული სიცივის პირობებში მეტი გაზი მოვიხმარეთ. აქ კი უნდა გავიხსენოთ მარტივი რჩევები:
- დარწმუნდით, რომ კარ-ფანჯრები მჭიდროდ იხურება. გამოიყენეთ დამათბუნებელი მასალები ცივი ჰაერის ინფილტრაციის შესაჩერებლად.
- დარწმუნდით რომ გამათბობლები არ არის დაბლოკილი ავეჯით, ფარდებით და სხვა დაბრკოლებით და სითბოს იძლევა საცხოვრებელში და არა გარე კედლის გასათბობად
- ბოლო სართულზე მაცხოვრებლებისთვის მნიშვნელოვანია სხვენის დათბუნება ქვაბამბით ან სხვა საიზოლაციო მასალით.
- გაითვალისწინეთ, რომ სადარბაზოების ღია კარები და ჩამტვრეული მინები ასევე მოქმედებს თქვენი საცხოვრებლის სითბოზე და, შეძლებისდაგვარად, ეს კარგვაც შეაჩერეთ.
- რკინის შემოსასვლელი კარები მნიშვნელოვან სითბოს დანაკარგს იწვევს და სასურველია დათბუნდეს თბოიზოლაციური მასალით.
- ფანჯრების ორმაგი შემინვა ხარჯიანი, თუმცა კარგად ცნობილი ეფექტური ღონისძიებაა", - ნათქვამია განცხადებაში.
