ბათუმში საახალწლო ღონისძიებები გრძელდება. დღეს, ევროპის მოედანზე მოსულ სტუმრებს კარგი მუსიკა, სასიამოვნო საახალწლო გარემო, პრიზები და საჩუქრები ელოდებათ. დღის 1 საათიდან „საახალწლო ეზო“-ში მყოფი ადამიანების განწყობაზე Dj-ები Vako T, Gabunia და Lasha Craft იზრუნებენ. საღამოს შვიდი საათიდან კი ჯგუფები „გამოუვალი მგომარეობა“, „Mellow“, „არა“ და „the Bearfox“.
გარდა ამისა, აჭარის ტურიზმის დეპარტამენტი „საახალწლო ეზოს პასპორტების“ მფლობელ ადამიანებს მაღალი კლასის სასტუმროებსა და რესტორნებში ღამისთევის, ვახშამის, სპა მომსახურების, მასაჟისა და კურორტ „გოდერძი“-ს ორკაციანი საგზურის მოგების საშუალებას აძლევს. 2 იანვარს, 18:00 საათზე, გათამაშებაში რეგისტრირებულ ადამიანებს შეეძლებათ ევროპის მოედანზე მოიგონ სასტუმროებისა და რესტორნების „ჰილტონი“, „რედისონ ბლუ ბათუმი“, „კოლიზეუმ მარინა“, „კასტელო მარე“, „ინტურისტ პალასი“, „ეუფორია“, „დივან სუიტი“, „ტერასა ასკანელი“ და „რენე“-ს მიერ დაწესებული პრიზები. ასევე, დღის მთავარი პრიზი კურორტ „გოდერძი“-ს ორდღიანი, ორკაციანი საგზური. აღნიშნული პრიზები დეპარტამენტმა ევროპის მოედანზე 1 იანვარსაც გაათამაშა. მთავარი პრიზის კურორტ „გოდერძი“-ს ორკაციანი საგზურის მფლობელი გახდა თინათინ ეგუტიძე, რომელსაც საჩუქარი იქვე გადაეცა.
„ევროპის მოედანი „საახალწლო ეზო“-თი ბათუმელებისა და ქალაქის სტუმრების თავშეყრის საყვარელ ადგილად იქცა. 25 დეკემბერიდან, აქ ყოველდღე იმართება სხვადასხვა ტიპის ღონისძიებები. თუმცა 1-2 იანვარს, გარდა სასიამოვნო გარემოსი და მუსიკისა ჩვენ სტუმრებს შევთავაზეთ საჩუქრები და პრიზები, რომელთა მიღებაც მათ „საახალწლო ეზოს პასპორტი“-თ შეუძლიათ. ჩართულობა აღნიშნულ აქტივობაში დიდია და ჩვენ მოლოდინი გვაქვს, რომ დღევანდელ ღონისძიებებს კიდევ უფრო ბევრი ადამიანი დაესწრება. #გარეთკაია, ასე ჰქვია ჩვენს პიარქტივობას, რასაც სოციალურ მედიაში პოზიტიური გამოხმაურება მოჰყვა და რითაც ჩვენ ამ პერიოდის განმავლობაში ადამიანებს ახალი წლის გარეთ, ევროპის მოედანზე აღნიშვნისკენ მოვუწოდებდით. გარეთ ნამდვილად კარგია და დღევანდელი მუსიკალური პროგრამა ამის კიდევ უფრო კარგ საშუალებას იძლევა,“ აცხადებს აჭარის ტურიზმის დეპარტამენტის თავმჯდომარის მოვალეობის შემსრულებელი მამუკა ბერძენიშვილი.
საახალწლო ღონისძიებების დეტალური პროგრამა განთავსებულია საიტზე garetkaia.ge
2 იანვარი
► 13:00 - 15:00 – DJ Vako T
► 15:00 - 17:00 Gabunia
► 17:00 - 19:00 Lasha Craft
► 19:00 - არა
► 20:00 - Mellow
► 21:00 - The Bearfox
► 22:00- „გამოუვალი მდგომარეობა“