ერთი თვეა, რაც რუსთავი 2 დეკლარირებულ გადასახადს ვერ იხდის - ამის შესახებ ტელეკომპანიის გენერალურმა დირექტორმა ნიკა გვარამიამ დღეს გამართულ ბრიფინგზე განაცხადა. გვარამიას თქმით, თუ რუსთავი 2-ს ყადაღა არ მოეხსნება, ის ვეღარ შეძლებს მაუწყებლობის გაგრძელებას.
"წელიწადზე მეტი გავიდა, რაც რუსთავი 2-ის და TV საქართველოს მთელ ქონებას ადევს ყადაღა. შესაბამისად, ჩვენ მოკლებული ვართ შესაძლებლობას, მივმართოთ ნებისმიერ საბანკო თუ საფინანსო ინსტიტუციას ოვერდრაფტისთვის, სესხისთვის და ა.შ., რასაც აკეთებს არა მხოლოდ ყველა ტელევიზია, არამედ ყველა ნორმალური, ჯანსაღი ბიზნესი მსოფლიოში. ამ ხნის განმავლობაში, ჩვენ პრაქტიკულად არასდროს დაგვიგვიანია ხელფასის გაცემა. სამწუხაროდ, ვაგვიანებთ პერიოდულად ჩვენი ვალდებულებების შესრულებას კრედიტორების წინაშე და ახლა უკვე დადგა ის მომენტი, როდესაც ვაგვიანებთ ჩვენი საგადასახადო ტვირთის აღსრულებას. უკვე ერთი თვეა, რაც რუსთავი 2-მა ვერ შეძლო დეკლარირებული გადასახადის სახელმწიფო ხაზინაში ჩარიცხვა. ერთი თვე საგადასახადო სამსახურმა გვაცადა, რისთვისაც ძალიან დიდი მადლობა მას, რომ გაგებით მოეკიდა ჩვენს სიტუაციას", - თქვა გვარამიამ.
ნიკა გვარამია ამბობს, რომ ვალდებულებების შეუსრულებლობა რუსთავი 2-ის წინააღმდეგ არსებული უკანონო ბრძოლის ბრალია.
"უნდა ვაცნობიერებდეთ, რომ მათ შორის სახელმწიფოს წინაშე, ჩვენი ვალდებულებების შეუსრულებლობა, მთლიანად არის გამოწვეული უკანონო სასამართლოს გადაწყვეტილებით, სახელმწიფოს მიერ უზრუნველყოფილი ამგვარი გადაწყვეტილებით. იმ ბრძოლის ბრალია, რომელსაც ჩვენს წინააღმდეგ უკანონოდ აწარმოებს ქართული სახელმწიფო და რაშიც, სამწუხაროდ, ჩართულია სასამართლო სისტემა. სამწუხაროდ, უზენაესმა სასამართლომ ვერ გამონახა დრო, რომ ემსჯელა ჩვენს შუამდგომლობაზე, ვიდრე საქმე დასრულდებოდა, ყადაღა მოხსნილიყო და ჩვენ შეგვძლებოდა გამართულად ფინანსური ოპერირება. დღეს უკვე მივედით ამ მდგომარეობამდე, როდესაც შეგვიძლია ჩვენი შიდა ვალდებულებების გასტუმრება, მაგრამ გვიდგას პრობლემა გარე ვალდებულებების გასტუმრების. აუცილებლად დავდგებით იმ მომენტის წინაშე, როცა გვექნება პრობლემები შიდა ვალდებულებების გასტუმრებასთან დაკავშირებით. აუცილებლად. იმდენად, რამდენადაც ჩვენ ვფუნქციონირებთ, როგორც ალყაშემორტყმული ციხესიმაგრე, რადგან ჩვენთვის შეუძლებელია ის, რაც ყველა ჩვენი კონკურენტისთვის, რომელიც ჩვენსავით საკუთარი შემოსავლებით კი არ ცხოვრობს, არამედ დამფუძნებლების დონაციებით, ფინანსური დახმარებით და ა.შ. მათთვისაც კი საჭიროა საბანკო ინსტიტუციებს მიმართონ, და არა მარტო მათთვის, არამედ იმ ბიზნესებისთვისაც, რომლებიც ყველაზე შემოსავლიანია საქართველოში განსხვავებით ტელევიზიისგან, რომლის სარეკლამო ბაზარიც, ამ ხელისუფლების გამო, ასევე ძალიან დაზიანებული და შემცირებულია", - თქვა ტელეკომპანიის გენერალურმა დირექტორმა და ხელისუფლებას მოუწოდა, რ2-ს მოხსნას ყადაღა.
"მივმართავ საგადასახდო სამსახურს, ჩვენ, როგორც ჩანს, ვერ შევასრულებთ ვალდებულებებს, ვიდრე ეს დავა არ მორჩება, ან მანამდე ჩვენს ქონებას არ მოეხსნება ყადაღა. ჩვენი საკუთრებისთვის, ჩვენი ანგარიშებისთვის საინკასო დავალების დადება საგადასახხადო სამსახურის მხრიდან იქნება ჩვენი ფინანსური მკვლელობა. ახლა მისი გადასაწყვტია, მისი დისკრეციის ფარგლებში უარს იტყვის საინკასო დავალებაზე, თუ პირდაპირ თუ ერთი შეხედვით ტექნიკური და ავტომატური საინკასო დავალების დადებით, მოკლავს რუსთავი 2-ს ფინანსურად. ჩვენი ეთერი ჯადოსნური სარკე კი არ არის, თავისით კი არ აჩვენებს, აქ ადამიანები მუშაობენ, რომლებიც ხელფასს იღებენ თავისი მაღალკვალიფიციური შრომისთვის. მე, როგორც მენეჯერი უხელფასოდ ვერავის ვერ ვამუშავებ. რუსთავი 2-ს უბრალოდ ეთერი გაეთიშება", - ამბობს გვარამია.
ტელეკომპანია უზენაეს სასამართლოში ასაჩივრებს საქალაქო და სააპელაციო სასამართლოების გადაწყვეტილებებს, რომელთა მიხედვითაც რუსთავი 2-ის 100% ქიბარ ხალვაშსა და მის კომპანია "პანორამას" მიეკუთვნა.