ქუთაისის საუნივერსიტეტო ქალაქის მშენებლობის რევოლუციური პროექტი გვაძლევს შესაძლებლობას, რომ საქართველო რეგიონში ვაქციოთ თანამედროვე ტექნოლოგიური განათლების ცენტრად, - ამის შესახებ საქართველოს პრემიერ-მინისტრმა გიორგი კვირიკაშვილმა მთავრობის სხდომაზე განაცხადა.
გიორგი კვირიკაშვილი 2016 წელს გატარებული რეფორმები შეაჯამა და აღნიშნა, რომ ქუთაისის საუნივერსიტეტო ქალაქის მშენებლობის დაწყება ძალიან მნიშვნელოვანია.
„2016 წელს დაიწყო ქუთაისის საუნივერსიტეტო ქალაქის მშენებლობის რევოლუციური პროექტი, რომლის განხორციელებაც ნამდვილად გვაძლევს შესაძლებლობას, საქართველო ვაქციოთ თანამედროვე ტექნოლოგიური განათლების ცენტრად რეგიონში. 2016 წელი იყო ასევე გარდამტეხი ზოგადად ტექნოლოგიური განვითარების დაწყების მიმართულებით. ქუთაისის გარდა, დაიწყო ტექნოლოგიური ცენტრის მშენებლობა თბილისში. შეიქმნა ტექნოპარკები თბილისსა და ზუგდიდში, ფაბ ლაბები, დაფინანსდა ინოვაციური და მაღალტექნოლოგიური სტარტაპები და ეს პროექტები მომავალშიც აუცილებლად გაგრძელდება. ამასთანავე დაიწყო საყოველთაო ინტერნეტიზაციის პროექტი, რომელიც ჩვენს ხალხს მთელი საქართველოს მასშტაბით მისცემს შესაძლებლობას, ისარგებლონ მაღალტექნოლოგიური ხელმისაწვდომი ინტერნეტით. შეიქმნა შინაგან საქმეთა სამინისტროს ოპერაციების ერთობლივი მართვის ცენტრი, რაც მოგვცემს საშუალებას, ახალი ტექნოლოგიების გამოყენებით ქვეყანაში უზრუნველვყოთ საზოგადოებრივი უსაფრთხოების მაღალი სტანდარტი”, - განაცხადა გიორგი კვირიკაშვილმა.
