გუდაურის იდეის განხორციელება ძველი გუდაურელების ენთუზიაზმით დაიწყო და აშენდა მსოფლიოში მართლაც ერთ-ერთი უმშვენიერესი კურორტი,- ამის შესახებ საქართველოს პრემიერ-მინისტრმა, გიორგი კვირიკაშვილმა გუდაურში, ახალი საბაგიროს გახსნაზე განაცხადა.
მისივე თქმით, ბოლო წლების განმავლობაში ძალიან ბევრი რამ გაკეთდა, რომ 2-ნახევარჯერ არის გაზრდილი ბოლო 4 წლის განმავლობაში ტურისტების რაოდენობა.
„ასე რომ, ჩვენ გაქვს უახლესი სისტემები, უახლესი საბაგიროები, სასტუმროები და ინვესტიციები, რომლებიც ხორციელდება დღეს ბაკურიანში. დღეს ჩვენ აქ გამოვედით, რათა გავხსნათ მსოფლიოში წამყვანი კომპანია Doppelmayr-ის მიერ დამონტაჟებული ახალი საბაგირო, რომელიც თვისობრივად გააუმჯობესებს მომსახურებას კურორტ გუდაურში. დავასრულეთ კანადურ კომპანია Ekozain-თან ერთად გუდაურის განვითარების გენერალური გეგმა და დღეიდან მოყოლებული, სტიქიური განვითარება ამ კურორტში აღარ იქნება. იქნება გეგმაზომიერი, თანამედროვე მსოფლიოს საუკეთესო სტანდარტებთან შესაბამისი განვითარება. ეს მოითხოვს გარკვეულ რეგულაციებს, მაგრამ ეს იქნება იმისთვის, რომ უფრო მეტი შემოსავალი ნახოს საოჯახო ტიპის, თუ დიდმა სასტუმრომ“,-აღნიშნა პრემიერმა.
მისივე თქმით, გუდაურში იყო ყოველთვის პრობლემა წყლის მომარაგება, წელს დასრულდა წყალმომარაგების გაუმჯობესების პირველი ეტაპი. 2018 წელს იქნება 24-საათიანი მომარაგება, მაგრამ წელს ეს საკითხი უკვე მნიშვნელოვნად არის გაუმჯობესებული.
პრემიერ-მინისტრმა ყურადღება გაამახვილა, აგრეთვე, მოთხილამურე პატრულის პროექტზეც.
„თქვენ ხედავთ მშვენივრად აღჭურვილ „სქი პატრულს“, რომელიც შსს-ს ძალიან მნიშვნელოვანი და ძალიან კარგი პროექტია. ეს არის ის წესრიგი, რომელიც საჭიროა მთის კურორტებზე, რათა არავინ დაზიანდეს და მართლწესრიგი იქნას უზრუნველყოფილი“,-აღნიშნა პრემიერმა.
მისივე თქმით, 2017 წელს იწყება გათოვლიანების მეორე ფაზა.
„2017 წლის ბოლოსთვის ჩვენ გვექნება ყველა ის ზონა დათოვლიანებული, სადაც ბუნებრივად არის დაბალთოვლიანობა, რათა იქნეს უზრუნველყოფილი სეზონის გახსნა, რომ მეტი შემოსავალი ნახონ ინვესტორებმა, სასტუმროს მფლობელებმა. ეს არის უმნიშვნელოვანესი პროექტი, რომელიც ჩვენ რამდენიმე წლის წინ დავიწყეთ. ასევე, მნიშვნელოვანია, რომ ჩვენ დავაფუძნეთ სათავგადასავლო-სამთო სკოლა. დღეიდან 2 წელიწადში ჩვენ გვეყოლება სერტიფიცირებული სამთო გიდები და სამთო-სათხილამურო ინსტრუქტორები. ეს ძალიან მნიშვნელოვანია, რათა ჩვენ ჩავჯდეთ ყველა იმ სტანდარტში, რომელშიც უნდა იყოს მსოფლიოს წამყვანი სამთო-სათხილამურო კურორტი“,-აღნიშნა გიორგი კვირიკაშვილმა.
მისივე თქმით, ეს ყველაფერი არის მნიშვნელოვანი უპირველეს ყოვლისა, მთის რეგიონის მცხოვრებლებისთვის, რათა მათ ჰქონდეთ მეტი შემოსავალი, მეტი დასაქმება.
„ეს ნიშნავს მეტ ტურისტს ქვეყანაში, ნიშნავს მეტ ქართულ პროდუქტს გაყიდულს უცხოეთის ბაზარზე, საქართველოს უფრო მაღალ ცნობადობას და მეტ ინვესტიციებს ჩვენს ქვეყანაში“,-აღნიშნა გიორგი კვირიკაშვილმა.
