დიდუბის რაიონის გამგეობა „სამოქალაქო პლატფორმა-ახალი საქართველოს“ ერთ-ერთი დამფუძნებლის თეონა ჭალიძის ბრალდებას ეხმაურება.
„თეონა ჭალიძის ეჭვი, საახალწლოდ უმწეო მოქალაქეებზე სასურსათო ნობათის შესყიდვის მიზნით გამოცხადებული ტენდერების წინასწარი ჩაწყობის შესახებ, ყოველგვარ საფუძველს მოკლებულია, რომ არაფერი ვთქვათ ავტორის ამ საკითხში კომპეტენციის შესახებ. კერძოდ, ქალბატონის მოსაზრებაზე ჩურჩხელის ტექნიკურ მონაცემებთან (ზომებთან-არანაკლებ 30სმ) დაკავშირებით, მოგახსენებთ, რომ სახელმწიფო შესყიდვების კანონისა და კანონქვემდებარე აქტების თანახმად, სატენდერო დოკუმენტაციაში საჭიროა შესყიდვის ობიექტის რაც შეიძლება ზუსტად აღწერა, რათა შეცდომაში არ შევიყვანოთ პრეტენდენტი ორგანიზაცია.
რას გულისხმობს ეს ჩურჩხელის შემთხვევაში? ჩურჩხელის ფასს განსაზღვრავს მისი ზომა, წონა და შემადგენლობა. სატენდერო დოკუმენტაციაში ჩურჩხელის წონად მითითებულია არანაკლებ 150 გრ. და ზომად - არანაკლებ 30 სმ. ეს მონაცემები გამგეობამ აიღო ბაზრის მოკვლევის შედეგად. შეირჩა ისეთი მონაცემები, რომლებიც აკმაყოფილებდნენ რამდენიმე ფირმის მიერ წარმოებულ ჩურჩხელას, რათა პრეტენდენტ ორგანიზაციას არჩევანის საშუალება ჰქონოდა.
დიდუბის რაიონის გამგეობის მიერ აღნიშნულ შესყიდვაზე გამოცხადდა ტენდერი აუქციონის გარეშე, სადაც მხოლოდ დაბალი ფასის დამფიქსირებელი პრეტენდენტი ჩანს და ტენდერში მონაწილე ვერც ერთი პრეტენდენტი სხვა მონაწილეს ერთიან ელექტრონულ სისტემაში ვერ ხედავს. პირველი ყველაზე დაბალი ფასის დამფიქსირებებლი პრეტენდენტი ი/მ „ვაჟა კვიჟინაძე“ დისკვალიფიცირდა არასრულყოფილი დოკუმენტების წარმოდგენის გამო. შემდგომმა ყველაზე დაბალი ფასის დამფიქსირებელმა პრეტენდენტმა ორგანიზაციამ - შპს „ტენდერი 123“-მა ნიმუშის სახით წარმოგვიდგინა 34 სმ-ის 170 გრ-ის მქონე ჩურჩხელა.
ამასთან ერთად, უნდა აღინიშნოს, რომ ჩურჩხელის დამზადების ტექნოლოგია არ არის რთულად შესასრულებელი და არ შეიძლება ითქვას, რომ სატენდერო დოკუმენტაციაში მითითებული ჩურჩხელის მონაცემები ვინმეზე მორგებულია, სამწუხაროდ, საზოგადოების გარკვეული ჯგუფი ცდილობს, აღნიშნული თემით გამგეობის დისკრედიტაცია მოახდინოს“, - ნათქვამია განცხადებაში.