როდის აიკრძალება მარჯვენასაჭიანი ავტომობილების რეგისტრაცია საქართველოში, ამ ეტაპზე უცნობია.
მარჯვენასაჭიანი და საჭეგადატანილი მანქანების რეგისტრაციის აკრძალვაზე საუბარი საქართველოში 2015 წლის დეკემბერში დაიწყო, როდესაც პარლამენტში ახალი კანონპროექტი შევიდა. კანონპროექტის ავტორები იმედოვნებენ, რომ მარჯვენასაჭიანი ავტომობილების რეგისტრაციის აკრძალვა მოძრაობას განტვირთავს და უსაფრთხოებას ხელს შეუწყობს.
შინაგან საქმეთა სამინისტროს მიერ ინიცირებული კანონპროექტის პირველად ვერსიაში იყო ჩანაწერი, რომ მარჯვენასაჭიანი ავტომობილების აკრძალვა 2016 წლის 1 მარტს უნდა მომხდარიყო, მაგრამ არასამთავრობო სექტორისა და ავტოიმპორტიორთა პროტესტის შემდეგ, კანონპროექტზე მსჯელობა პარლამენტში შეწყდა. მარჯვენასაჭიანი და საჭეგადატანილი მანქანების რეგისტრაციის აკრძალვის სავარაუდო თარიღად კი 2017 წლის 1 იანვარი დასახელდა.
კანონპროექტი პარლამენტშია და ის ახალი მოწვევის პარლამენტმა უნდა განიხილოს. აღსანიშნავია, რომ კანონპროექტის ერთ-ერთი ავტორი, შსს-ს მინისტრის ყოფილი მოადგილე არჩილ თალაკვაძე, ახლა უკვე პარლამენტში, საკონსტიტუციო უმრავლესობით მოხვედრილი გუნდის დეპუტატია.
როდის მოხდება აღნიშნული აკრძალვის დაკანონება - 1 იანვარს, თუ 1 მარტს, ჯერ-ჯერობით უცნობია, მაგრამ ის უნდა მიიღოს ახალმა პარლამენტმა ახალი შემადგენლობით.