ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის მოადგილის გიგა გიორგაძის განცხადებით, დევნილებს, რომლებმაც ამხანაგობები შექმნეს, საერთო სარგებლობის ფართები საკუთრებაში გადაეცემათ.
გიორგაძის თქმით, აღნიშნული საკითხი დღევანდელ მთავრობის სხდომაზე ეკონომიკის სამინისტრომ გაიტანა.
„მთავრობის სხდომაზე ეკონომიკის სამინისტრომ დევნილებისთვის ძალიან მნიშვნელოვანი საკითხი გამოიტანა. აქტიურად მიმდინარეობს პრივატიზაციის პროცესი. დევნილებს მათ სარგებლობაში არსებული ფართები საკუთრებაში გადაეცემათ, თუმცა რჩებოდა ერთი პრობლემა - საერთო სარგებლობის ფართები, როგორიცაა დერეფანი, სხვენი, სარდაფი და სხვა, კვლავ სახელმწიფო საკუთრებაში იყო. შესაბამისად, დევნილები ყველა იმ ბენეფიტით ვერ სარგებლობდნენ, რაც მუნიციპალური პროგრამებით, თანადაფინანსებისა და ამხანაგობების კუთხით შეიძლებოდა ყოფილიყო.. მივიღეთ გადაწყვეტილება, რომ დევნილები, რომლებმაც ამხანაგობები შექმნეს, საერთო სარგებლობაში არსებული ფართები საკუთრებაში გადაეცემათ და ისინი ყველა იმ პროგრამით ისარგებლებენ, რაც ამხანაგობებისთვის მუნიციპალიტეტებს აქვს. ეს ეხება ყველას, ვისაც უკვე დაუმტკიცდა საკუთრება და მომავალშიც დაუმტკიცდება“, - აღნიშნა გიორგაძემ.