ნატო-ს გენერალური მდივანი აცხადებს, რომ ვარშავის სამიტი ნატო-ს ერთიანობასა და სიძლიერეს წარმოაჩენს. ამის შესახებ იენს სტოლტენბერგმა ვარშავაში, პრეზიდენტის სასახლეში პოლონეთის ლიდერთან, ანჟეი დუდასთან ერთობლივ პრესკონფერენციაზე განაცხადა.
მისივე თქმით, დღეს მსოფლიო უფრო საშიშია, ვიდრე რამდენიმე წლის წინ იყო.
,,მსოფლიო უფრო საშიში გახდა, ვიდრე რამდენიმე წლის წინ იყო. ნატო საფრთხეებს სწრაფად და გადამწყვეტად პასუხობს. ორი დღის განმავლობაში ჩვენ რამდენიმე მნიშვნელოვან ნაბიჯს გადავდგამთ, რომლებიც მიმართული იქნება ალიანსის თავდაცვისუნარიანობისა და სტაბილურობის გაძლიერებისა და ნატო-ს ფარგლებს გარეთ უსაფრთხოების უზრუნველსაყოფად. ნაბიჯები მოიცავს აქ, პოლონეთში, ასევე ესტონეთში, ლატვიასა და ლიტვში ნატო-ს ძალების რაოდენობის გაზრდას. ეს იქნება მკაფიო მესიჯი - თავდასხმა ერთ მოკავშირეზე ნიშნავს მთელ ალიანსზე თავდასხმას. ეს იქნება გადამწყვეტი სამიტი ვარშავაში და მნიშვნელოვანი სამიტი ალიანსის ისტორიაში” , - განაცხადა იენს სტოლტენბერგმა.
ჩრდილოატლანტიკური ალიანსის სამიტი ვარშავაში ხვალ იხსნება. ნატო-ს მაღალჩინოსნებისა და მსოფლიო ლიდერების ჩასვლამდე პოლონეთის დედაქალაქში უსაფრთხოების ზომები გააძლიერეს, გამკაცრდა საზღვრის კონტროლიც.
